मोरक्कोलाई हराउँदै फ्रान्स सेमिफाइनलमा, एमबाप्पेको २०औँ विश्वकप गोल

काठमाडौं । फिफा विश्वकप २०२६ को पहिलो क्वाटरफाइनलमा फ्रान्सले मोरक्कोलाई २–० ले पराजित गर्दै सेमिफाइनलमा स्थान सुरक्षित गरेको छ। अमेरिकाको फक्सबरोस्थित गिलेट स्टेडियममा भएको खेलको पहिलो हाफ गोलरहित बराबरीमा सकिए पनि दोस्रो हाफमा फ्रान्सले उत्कृष्ट पुनरागमन गर्दै लगातार दुई गोल गरेर जित आफ्नो पक्षमा पारेको हो। पहिलो हाफमा फ्रान्सका कप्तान किलियन एमबाप्पेले पेनाल्टीको अवसर गुमाएका थिए भने मोरक्कोले पनि सशक्त रक्षात्मक प्रदर्शन गर्दै फ्रान्सलाई गोलरहित बनाएको थियो। तर दोस्रो हाफको ६०औँ मिनेटमा एमबाप्पेले आकर्षक कर्लिङ प्रहारमार्फत गोल गर्दै फ्रान्सलाई अग्रता दिलाए। त्यसको मात्र छ मिनेटपछि उस्मान डेम्बेलेले बक्सबाहिरबाट शक्तिशाली प्रहार गर्दै दोस्रो गोल थपेपछि फ्रान्स २–० ले अघि बढ्यो। त्यसपछि मोरक्कोले केही अवसर सिर्जना गरे पनि गोल फर्काउन सकेन र फ्रान्सले सहज रूपमा जित सुरक्षित गर्‍यो।
यस जितसँगै फ्रान्सले अब सेमिफाइनलमा स्पेन र बेल्जियमबीचको क्वाटरफाइनल खेलको विजेतासँग प्रतिस्पर्धा गर्नेछ।

यो खेल एमबाप्पेका लागि पनि ऐतिहासिक बन्यो। मोरक्कोविरुद्ध गरेको गोल उनको विश्वकप करियरको २०औँ गोल हो। उनले यो कीर्तिमान केवल २० विश्वकप खेलमै पूरा गर्दै विश्व फुटबल इतिहासका महान गोलकर्ताको सूचीमा आफ्नो स्थान अझ बलियो बनाएका छन्। यस संस्करणमा पनि उनी गोल्डेन बुटको प्रमुख दाबेदारका रूपमा अघि बढिरहेका छन्।