यस्तो छ आज उम्मेदवारी दर्ता कार्यक्रम, आयोगले भन्यो- तडकभडक नगर्नू

काठमाडौँ – प्रतिनिधिसभा सदस्यका लागि आउँदो फागुन २१ गते हुने निर्वाचनका लागि आज देशभरका १ सय ६५ निर्वाचन क्षेत्रमा प्रत्यक्षतर्फ उम्मेदवारी दर्ता हुँदैछ। सबै निर्वाचन क्षेत्रमा एकै दिन मनोनयन दर्ता हुने निर्वाचन आयोगले जनाएको छ।

प्रमुख राजनीतिक दलहरूले अधिकांश निर्वाचन क्षेत्रमा उम्मेदवार टुङ्ग्याइसकेका छन् भने केही विवादित क्षेत्रका उम्मेदवार आज बिहानसम्म टुंगो लगाउने तयारी कांग्रेसलगायत दलको छ। शीर्ष नेताहरू तथा टिकट पाएका अधिकांश उम्मेदवार आ–आफ्नो निर्वाचन क्षेत्रमा पुगिसकेका छन्।

एमाले अध्यक्ष केपी शर्मा ओली झापा, नेकपाका संयोजक पुष्पकमल दाहाल ‘प्रचण्ड’ रुकुम पूर्व तथा सहसंयोजक माधवकुमार नेपाल रौतहट पुगेका छन्। यसपटक पूर्वप्रधानमन्त्री शेरबहादुर देउवा उम्मेदवार नहुने भएका छन्। राष्ट्रिय स्वतन्त्र पार्टीका वरिष्ठ नेता बालेन शाह झापामा मनोनयन दर्ता गर्दैछन् भने सभापति रवि लामिछाने चितवन पुग्ने क्रममा छन्।

निर्वाचन कार्यालयहरूले उम्मेदवारी दर्ताको समय तोकिसकेका छन्। आचारसंहिता लागू भइसकेकाले मनोनयनका क्रममा तडकभडक नगर्न निर्वाचन आयोगले दल र उम्मेदवारलाई आग्रह गरेको छ। आयोगका अनुसार आज बिहान १० बजेदेखि बेलुका ५ बजेसम्म मनोनयन दर्ता हुनेछ। त्यसपछि बेलुका ५ देखि ७ बजेसम्म उम्मेदवारको प्रारम्भिक सूची प्रकाशित गरिनेछ।

मनोनयनपत्रविरुद्ध उजुरी दिने अवधि भोलि बिहान १० बजेदेखि दिउँसो ३ बजेसम्म तोकिएको छ। उजुरी र मनोनयनपत्रको जाँचबुझपछि पर्सि बिहीबार बेलुका ५ बजेसम्म उम्मेदवारको नामावली प्रकाशित गरिनेछ। शुक्रबार बिहान १० देखि दिउँसो १ बजेसम्म उम्मेदवारी फिर्ता लिने समय रहनेछ। सोही दिन दिउँसो १ देखि ३ बजेसम्म अन्तिम नामावली र दिउँसो ४ देखि बेलुका ७ बजेसम्म चुनाव चिह्न प्रदान गरिने कार्यतालिका छ। फागुन २१ गते बिहान ७ बजेदेखि बेलुका ५ बजेसम्म मतदान हुने निर्वाचन आयोगले जनाएको छ।