कम्बोडियामा ३ हजार करोड डलर लगानी गरेको पत्ता लगाउनेलाई एक हजार थपेर दिन्छु: प्रम ओली

पोखरा । प्रधानमन्त्री एवम् नेकपा एमालेका अध्यक्ष केपी शर्मा ओलीले कम्बोडियाको टेलिकममा ३ हजार करोड डलर लगानी गरेको आरोप लगाउनेहरुले त्यसलाई पत्ता लगाएमा थप १ हजार बक्सिस दिएर सबै शेयर जिम्मा लगाउने चुनौती दिनु भएको छ ।

पोखरामा पार्टीको प्रदेशस्तरीय कार्यक्रमलाई सम्बोधन गर्दै अध्यक्ष ओलीले एमालेलाई बदनाम र कमजोर पार्न आफूमाथि यस्ता आरोपहरु आइरहने बताउनु भयो । उहाँले विगतमा पनि ६० वर्ष पुगेकालाई गोली हानेर मार्छन् भन्ने आरोप लगाएको स्मरण गर्नुभयो।

प्रधानमन्त्री ओलीले भन्नुभयो, ‘कम्बोडियामा ३ हजार करोड मैले राखेको छु भने धेरै नाफा हुने बिजनेस दिन्छु । देशको यत्रो पैसा लुकाएको रहेछु भने पत्ता लगाउनुस्, धेरै त छैन एक हजार डलर थपेर सबै दिन्छु । एक हजार डलर बक्सिस भयो, अरु ३ हजार करोड सबै भयो ।’