वन तथा वातावरणमन्त्री ऐनबहादुर शाही ठकुरीसँग नेपालका लागि संयुक्त राज्य अमेरिकाका राजदूत डिन आर थम्प्सनले शिष्टाचार भेट गर्नुभएको छ । उहाँहरुबीच मन्त्रालयमा भएको भेटवार्तामा दुई मुलुकबीचको सम्बन्धलाई थप प्रगाढ बनाउने सम्बन्धमा छलफल भएको जनाइएको छ ।

दिउँसो १ बजेदेखि झण्डै आधा घण्टा भएको भेटमा मन्त्री ठकुरीले अमेरिकाको अन्तर्राष्ट्रिय विकास सहयोग नियोग (युएसआइडी)ले विगत सात दशकदेखि नेपालको विकासमा पुर्याएको सहयोगका लागि धन्यवाद दिनुभएको छ । उहाँले पछिल्ला दिनमा एमसिसीलगायत विभिन्न परियोजनामार्फत पूर्वाधार विकासमा अमेरिकी सरकारको महत्वपूर्ण सहयोग रहँदै आएको उल्लेख गर्नुभयो ।

राजदूत थम्प्सनले वन मन्त्रालयको आगामी कार्ययोजना तथा समस्या र समधानका उपायबारे जानकारी लिनुभएको मन्त्रालयले जनाएको छ ।