खोटाङ कांग्रेसमा वडा अधिवेशनमै विवाद, ३० भन्दा बढी वडा सभापति बाहिर

खोटाङ। नेपाली कांग्रेसको १५औँ महाधिवेशनअन्तर्गत देशभर वडा अधिवेशन भइरहँदा खोटाङमा भने विवाद चर्किएको छ। संस्थापन पक्षले अघि बढाएको वडा अधिवेशनप्रति असन्तुष्टि जनाउँदै खोटाङका ३० भन्दा बढी वडा सभापतिले अधिवेशन बहिष्कार गरेको दाबी गरिएको छ।

खोटाङ कांग्रेसका नेता पेशल कुमार राईका अनुसार जिल्लाका विभिन्न वडामा वडा सभापति तथा स्थानीय नेतृत्वको सहभागिताबिनै अधिवेशन अघि बढाउन खोजिएको छ। उनका अनुसार नुनथला, मौवाबोटे, निर्मलीडाँडा, डुबेकेललगायत दर्जनौँ वडामा अधिवेशन हुन सकेको छैन भने धेरै वडामा वडा सभापतिको उपस्थिति नरहेको अवस्था छ।

राईका अनुसार स्थानीय पार्टी नेतृत्वसँग पर्याप्त समन्वय नगरी अधिवेशन अघि बढाउन खोजिएपछि असन्तुष्टि बढेको हो। ‘अधिवेशन’का नाममा स्थानीय संगठन र नियमित रूपमा पार्टीमा सक्रिय रहेका कार्यकर्तालाई बेवास्ता गरिएको भन्दै कतिपय वडा सभापति प्रक्रियाबाट अलग बसेको उनको दाबी छ।

खोटाङको विवादले कांग्रेसको तल्लो तहमा देखिएको असन्तुष्टिलाई सतहमा ल्याएको छ। केन्द्रमा पार्टी नेतृत्वबीचको विवादसँगै त्यसको प्रभाव वडा तहसम्म पुगेको स्थानीय नेताहरूको भनाइ छ। महाधिवेशनमार्फत नयाँ नेतृत्व र संगठन निर्माण गर्नुपर्ने समयमा नै वडा तहमा सहमति जुट्न नसक्नुले कांग्रेसको संगठनात्मक अवस्थामाथि प्रश्न उठाएको छ।

देशभर भने कांग्रेसको वडा अधिवेशन प्रक्रिया अघि बढिरहेको छ। केन्द्रीय निर्वाचन समितिका अनुसार ७३ जिल्लाका करिब ६ हजार वडामा वडा कार्यसमिति तथा क्षेत्रीय प्रतिनिधि चयन भइसकेका छन्। निर्वाचन समितिका सदस्य–सचिव राजु कटुवालले अधिवेशन उत्साहपूर्ण रूपमा सम्पन्न भइरहेको बताएका छन्।

तर, खोटाङको अवस्थाले केन्द्रीय निर्वाचन समितिले दाबी गरेजस्तो सबै ठाउँमा अधिवेशन समान रूपमा सहज नभएको देखाएको छ। कतिपय ठाउँमा वडा समिति र क्षेत्रीय प्रतिनिधि चयन भए पनि स्थानीय स्तरमा वास्तविक संगठनात्मक सहभागिता र नेतृत्वको भूमिकाबारे प्रश्न उठेका छन्।

विशेषगरी एउटै समूहका व्यक्तिहरू वडा समिति र क्षेत्रीय प्रतिनिधिमा दोहोरिएको, लामो समयदेखि गाउँमा नरहेका तथा पार्टीको स्थानीय गतिविधिमा सक्रिय नरहेका व्यक्तिहरूलाई समेत प्रतिनिधिका रूपमा समेटिएको भन्दै केही स्थानीय कार्यकर्ताले असन्तुष्टि जनाएका छन्।

कांग्रेसभित्रको विवाद केवल वडा अधिवेशनमा सीमित छैन। पूर्वसभापति शेरबहादुर देउवा पक्षले संस्थापन पक्षले अघि बढाएको महाधिवेशन प्रक्रियामा असहमति जनाउँदै समानान्तर गतिविधि अघि बढाइरहेको छ। यसले १५औँ महाधिवेशनअघि नै पार्टीभित्रको विभाजन थप स्पष्ट देखिएको छ।

खोटाङमा वडा सभापतिहरूको बहिष्कार र कतिपय वडामा अधिवेशन नै हुन नसकेको घटनाले महाधिवेशनको वैधानिक र संगठनात्मक प्रक्रियामाथि पनि प्रश्न उठाउने ठाउँ दिएको छ। वडा तहबाट चयन हुने प्रतिनिधिले नै माथिल्ला तहको नेतृत्व चयनमा भूमिका खेल्ने भएकाले वडा अधिवेशनमा देखिएको विवादको प्रभाव आगामी अधिवेशनका चरणमा समेत पर्न सक्ने देखिन्छ।

यसैबीच, भोटेकोशी बाढीबाट प्रभावित रसुवा, नुवाकोट र धादिङमा पनि वडा अधिवेशन हुन सकेको छैन। सप्तरीका क्षेत्र नं. २ र ४, सिरहा, मोरङ क्षेत्र नं. ६, रौतहट क्षेत्र नं. १, सर्लाही क्षेत्र नं. २ र परासी क्षेत्र नं. २ लगायतका क्षेत्रमा पनि अधिवेशन प्रक्रिया पूरा हुन बाँकी छ।

निर्वाचन समितिले बाँकी रहेका वडा अधिवेशन असोज ५ गते सोमबार निरन्तर सञ्चालन गर्ने जनाएको छ। कांग्रेसको १५औँ महाधिवेशन असोज १६ देखि १९ गतेसम्म काठमाडौंमा हुँदैछ।

तर, महाधिवेशनको मिति नजिकिँदै गर्दा खोटाङमा देखिएको विवादले कांग्रेसको तल्लो तहमा नेतृत्व चयनप्रतिको असन्तुष्टि र केन्द्रमा देखिएको राजनीतिक ध्रुवीकरणबीचको सम्बन्धलाई भने थप उजागर गरेको छ।