१६ दिनसम्म बेपत्ता इन्जिनियर दम्पतीसहित चारैजनाको कुशको शव बनाएर अन्तिम संस्कार

काठमाडौं । भोटेकोसी बाढीपछि १६ दिनसम्म खोजी गर्दा पनि फेला नपरेका इन्जिनियर दम्पतीसहित उनीहरूका दुई सन्तानको परिवारले अन्तिम संस्कार गरेको छ । परिवारले बिहीबार (भदौ २५) हिन्दु परम्पराअनुसार चारैजनाको कुशको शव बनाएर अन्तिम संस्कार गरेको हो ।

त्रिशूली–३ ‘बी’ जलविद्युत् आयोजनामा कार्यरत बागलुङ नगरपालिका–९, तित्याङका ३३ वर्षीय इन्जिनियर राजेश शर्मा पौडेल, उनकी ३१ वर्षीया श्रीमती प्रमिला पाठक तथा उनीहरूका चार वर्षीय छोरा आदित्य र दुई वर्षीया छोरी अदिती बाढीपछि बेपत्ता भएका थिए ।

१६ दिनसम्म खोजी गर्दा पनि उनीहरूको अवस्था पत्ता लाग्न नसकेपछि परिवारले कुशको शव बनाएर अन्तिम संस्कार गरेको हो । राजेश परिवारका एक्ला छोरा थिए ।

यसैबीच, बाढीपछि अझै १६ जना बेपत्ता रहेको जिल्ला प्रहरी कार्यालयले जनाएको छ । प्रहरीका अनुसार त्रिशूली हाइड्रोपावरमा कार्यरत तमानखोला गाउँपालिकाका नौ, ढोरपाटन नगरपालिकाका दुई, गलकोट नगरपालिकाका एक तथा त्रिशूली–३ ‘बी’ आयोजनामा कार्यरत बागलुङ नगरपालिकाका चार जना अझै सम्पर्कविहीन छन् ।

बेपत्ताहरूको खोजी तथा उद्धार प्रयास जारी रहे पनि उनीहरूको अवस्था अझै पत्ता लाग्न सकेको छैन ।