छठ गीतमा चर्चित ‘बिहारकी कोकिला’ शारदा सिन्हाको छठ पर्वमै निधन

काठमाडौँ ।‘बिहारकी कोकिला’ उपनामले प्रसिद्ध भारतीय गायिका शारदा सिन्हाको ७२ वर्षको उमेरमा मंगलबार नयाँदिल्लीको एम्स अस्पतालमा निधन भएको छ। सिन्हाले भोजपुरी, मैथिली र हिन्दीमा गीत गाएकी थिइन्। छठ पर्व सम्बन्धित गीत गायनमा उनको विशेष पहिचान थियो।

सिन्हाको छठ पर्वकै बेला निधन भएको छ। शारदा सिन्हाको स्वर बिहार र उत्तर प्रदेशमा लोकप्रिय थियो। संगीत क्षेत्रमा योगदान दिएबापत सिन्हाले भारत सरकारबाट उपलब्ध गराइने पद्मभूषण, पद्मश्री जस्ता प्रतिष्ठित पुरस्कार प्राप्त गरेकी थिइन्। छोरा अंशुमान सिन्हाले आमा शारदाको मृत्यु भएको जानकारी सामाजिक सञ्जालमामार्फ दिएको भारतीय सञ्चारमाध्यले जनाएका छन्।

सिन्हाको निधनमा भारतीय प्रधानमन्त्री नरेन्द्र मोदीले शोक व्यक्त गर्दै एक्समा लेखेका छन्, ‘प्रसिद्ध लोकगायिका शारदा सिन्हाको निधनले अत्यन्त दुःखी छु। उनका मैथिली र भोजपुरीमा गाएका लोकगीतहरू पछिल्ला केही दशकदेखि निकै लोकप्रिय छन्। आस्थाको महापर्व छठसँग जोडिएका उनका सुमधुर गीत सधैँ गुन्जिरहनेछन्। उनको अवसानले संगीत क्षेत्रमा अपूरणीय क्षति पुगेको छ। यस शोकको घडीमा म उनका परिवार र प्रशंसकहरूप्रति सहानुभूति व्यक्त गर्छु। ॐ शान्ति।’

लोकसभामा विपक्षी दलका नेता राहुल गान्धीले एक्समा लेखेका छन्, ‘आफ्नो मधुर आवाजका लागि प्रसिद्ध लोकगायिका शारदा सिन्हाजीको निधनको खबर अत्यन्त दुःखद छ। उनका शोकसन्तप्त परिवारजन र प्रशंसक प्रति म गहिरो समवेदना व्यक्त गर्दछु।’

बिहारका मुख्यमन्त्री नितीश कुमारले शोक व्यक्त गर्दै भनेका छन्, ‘शारदा सिन्हाले छठ महापर्वमा आफ्नो सुरीलो आवाजमा गाएका मधुर गीतहरू बिहार, उत्तर प्रदेशलगायत देशका सबै भागमा गुञ्जने गरेका थिए। उनको निधनले संगीतको क्षेत्रमा अपूरणीय क्षति पुगेको छ।’आरजेडीका राष्ट्रिय नेता लालुप्रसाद यादव, पूर्व मुख्यमन्त्री श्रीमती राबडी देवी र तेजस्वीप्रसाद यादवले पनि उनको निधनमा गहिरो शोक व्यक्त गरेका छन्।