विश्वकप डिभिजन लिग-२ : आज स्कटल्याण्ड र अमेरिका भिड्दै

काठमाडौं । आइसीसी पुरुष क्रिकेट विश्वकप डिभिजन लिग–२ अन्तर्गत आज स्कटल्याण्ड र अमेरिकाबीच प्रतिस्पर्धा हुँदैछ । खेल काठमाडौंस्थित त्रिवि क्रिकेट मैदान मा बिहान ९ः३० बजे सुरु हुनेछ ।

जारी सिरिजको आफ्नो पहिलो खेलमा स्कटल्याण्डले घरेलु टोली नेपाललाई २ रनले पराजित गर्दै विजयी सुरुआत गरेको थियो । अमेरिका भने यस सिरिजमा पहिलो खेल खेल्न लागेको हो ।

एकदिवसीय अन्तर्राष्ट्रिय क्रिकेटमा अमेरिका र स्कटल्याण्ड हालसम्म ८ पटक आमनेसामने भएका छन् । तीमध्ये स्कटल्याण्डले ५ खेल जितेको छ भने अमेरिकाले ३ खेल आफ्नो पक्षमा पारेको छ । दुवै टोलीबीच पछिल्लोपटक २०२४ अक्टोबरमा भएको भेटमा स्कटल्याण्ड ७१ रनले विजयी भएको थियो ।

हाल जारी विश्वकप डिभिजन लिग–२ अंकतालिकामा अमेरिका २४ खेलबाट ३६ अंकसहित शीर्ष स्थानमा रहेको छ । स्कटल्याण्ड पनि २९ खेलबाट समान ३६ अंक जोड्दै रनरेटका आधारमा दोस्रो स्थानमा छ ।

यस सिरिजअन्तर्गत मे १६ मा नेपाल र अमेरिका, मे १८ मा नेपाल र स्कटल्याण्ड, मे २० मा स्कटल्याण्ड र अमेरिका तथा मे २२ मा नेपाल र अमेरिका भिड्ने तालिका रहेको छ ।