रास्वपाको नवनिर्वाचित नेतृत्वको शपथ बुधबार

काठमाडौं । राष्ट्रिय स्वतन्त्र पार्टी (रास्वपा) को ऐतिहासिक प्रथम महाधिवेशनबाट निर्वाचित पदाधिकारी तथा केन्द्रीय सदस्यहरूको शपथ ग्रहण कार्यक्रम बुधबार आयोजना हुने भएको छ।

पार्टीका अनुसार शपथ ग्रहण कार्यक्रम बिहान ११ बजे काठमाडौंको बनस्थलीस्थित केन्द्रीय कार्यालयमा हुनेछ।

चितवनमा सम्पन्न महाधिवेशनबाट सभापति, दुई उपसभापति, एक महामन्त्री, तीन सहमहामन्त्रीसहित ९९ जना केन्द्रीय सदस्य निर्वाचित भएका थिए। १५८ सदस्यीय केन्द्रीय समितिमा अब सभापति रवि लामिछानेले ५१ जना सदस्य मनोनित गर्ने व्यवस्था रहेको छ। साथै, सातै प्रदेशका सभापतिहरू स्वतः केन्द्रीय सदस्य रहनेछन्।

विधानअनुसार सभापति लामिछानेले पदाधिकारीतर्फ एक उपसभापति, एक महामन्त्री, दुई सहमहामन्त्री, एक कोषाध्यक्ष, दुई सहकोषाध्यक्ष, एक प्रवक्ता तथा तीन सहप्रवक्ता मनोनित गर्ने अधिकार राख्नेछन्।