विवादित अभिव्यक्ति दिएका डा. निकोलस गोरखाबाट समातिए

काठमाडौं । पछिल्लो समय प्रधानमन्त्री सुशीला कार्की, काठमाडौंका मेयर बालेन्द्र साह र पूर्वप्रधानमन्त्री केपी शर्मा ओलीसहितविरुद्ध विवादित अभिव्यक्ति दिइरहेका डा. निकोलश भुसाल गोरखाबाट समातिएका छन् ।उनलाई उपत्यका अपराध अनुसन्धान कार्यालयको टोलीले गोरखा नगरपालिका–८ स्थित सरस्वती आश्रमबाट पक्राउ गरेको हो। भुसालले सामाजिक सञ्जालमा अराजक अभिव्यक्ति दिएर हिंसा भड्काउन खोजेको भन्दै प्रहरीले निगरानीमा राखेको थियो ।

भुसालले केही दिनअघि काठमाडौंमा भदौ २४ गते सत्ताबाट बाहिरिएका तत्कालीन प्रधानमन्त्री केपी शर्मा ओली र गृहमन्त्री रमेश लेखकविरुद्ध अराजक अभिव्यक्ति दिँदै घर जलाउने धम्की दिएका थिए । भुसालले शनिबार सम्वाद डबलीमा पत्रकार सम्मेलन गरेरेर भदौ २३ गते जेन-जी आन्दोलनमा दमनमा संलग्न ओली र तत्कालीन गृहमन्त्री लेखकलाई हत्यारा भनेका थिए । यी नेतालाई सरकारले कारबाही नगरेमा आफ्नो समूह उत्रिएर घरमै आक्रमण गर्ने धम्की उनले दिएका थिए ।

सरकारले तत्कालीन प्रधानमन्त्री र गृहमन्त्रीलाई कारबाही नगरेको भन्दै काठमाडौं महानगरका मेयर साहले जस्तै भुसाल पनि यो सरकारमाथि खनिएका छन् । भुसालले प्रधानमन्त्री सुशीला कार्कीलाई ‘हुतिहारा’ भनेर आपत्तिजनक टिप्पणी गरेका थिए ।भुसालले २३ असोजमा माइतीघरमा प्रदर्शन गर्न खोज्दा प्रहरीले नियन्त्रणमा लिएको थियो । त्यसपछि नेपाल प्रहरी अस्पतालमा स्वास्थ्य जाँच गर्दा गाँजा खाएको मेडिकल रिपोर्ट आएपछि पुर्स्थापना केन्द्रमा लैजान भनिएको थियो ।

भुसालले आफूलाई कारबाही गरेर देखाउन सरकारलाई चुनौती दिएका बेला समातिएका हुन् । उनी दलहरूसँग सरकारले छलफल गरेकोमा पनि आक्रोशत थिए । उनले फागुन २१ गते प्रत्यक्ष कार्यकारी प्रमुख चुनाव गर्नुपर्ने बताइरहेका छन् ।उनले दुई दिनअघि सरकारविरुद्ध माइतीघर मण्डलमा प्रदर्शनमा उत्रिन भनेका थिए । तर उनै माइतीघरमा आएनन् । यही शनिबार दिएको आपत्तिजनक अभिव्यक्तिका कारण उनी समातिएका हुन् ।