टप एन्ड टी–२० सिरिजः नेपालले चौथो खेल  होबार्ट हरिकेन्ससँग खेल्दै

काठमाडौं । टप एन्ड टी–२० सिरिजमा आज नेपाल आफ्नाे चौथो खेल  होबार्ट हरिकेन्ससँग खेल्दै छ । अस्ट्रेलियाको नर्दन टेरिटोरीमा जारी खेलमा नेपालले आज बिग ब्यास लिगको अनुभवी टोली होबार्ट हरिकेन्ससँग खेल्न लागेकाे हाे ।

लगातार तीन हार बेहोरेको नेपाली राष्ट्रिय क्रिकेट टोली आज पहिलो जितको खोजीमा छ । डार्विनको पार्मस्र्टनस्थित काजालिस एरेनामा हुने खेल नेपाली समयअनुसार बिहान ११ : १५ बजे सुरु हुनेछ ।

कप्तान रोहित पौडेलको नेतृत्वमा नेपाली टोली रहेको छ भने हरिकेन्सको कप्तानी बिग ब्यासका अनुभवी खेलाडी म्याकालिस्टर राइटले सम्हाल्नेछन् ।

जारी प्रतियोगितामा नेपालले यसअघिका तीनवटै खेलमा हार बेहोरेको छ । नेपाल पहिलो खेलमा एनटी स्ट्राइकसँग ४२ रन, दोस्रोमा बंगलादेश ‘ए’ सँग ३२ रन र तेस्रो खेलमा मेलबर्न स्टार्ससँग ३१ रनले पराजित भएको थियो ।

होबार्टले ३ खेल खेलेको होबार्टले १ खेलमा जित निकालेको छ भने दुई खेलमा पराजित भएको छ । पहिलो खेलमा एसीटीलाई हराएको होबार्ट त्यसपछि मेलबर्न स्टार्स र एनटी स्ट्राइकसँग पराजित भएको थियो ।