भोलि सूर्यग्रहण लाग्दै, नेपालबाट भने नदेखिने

काठमाडौं । भोलि बुधबार अर्थात् १२ अगस्ट (२७ साउन २०८३) मा सूर्यग्रहण लाग्दैछ । खगोलविद्का अनुसार यो सूर्यग्रहण विश्वका विभिन्न क्षेत्रमा पूर्ण तथा आंशिक रूपमा देखिनेछ ।

नासाका अनुसार उत्तरी रुस, ग्रिनल्यान्ड, आइसल्यान्ड, स्पेन र पोर्चुगलका केही भागबाट सूर्यग्रहण पूर्ण रूपमा देखिनेछ । उत्तरी रुसको दुर्गम क्षेत्रमा दिउँसो देखिने ग्रहण पूर्वतर्फ सर्दै स्थानीय समयअनुसार सूर्यास्त हुनुअघि स्पेनमा देखिनेछ ।

त्यस्तै, अमेरिकाको उत्तरी भाग, क्यानडा, उत्तर–पश्चिमी अफ्रिका तथा युरोपका अधिकांश क्षेत्रमा सूर्यग्रहण आंशिक रूपमा देखिनेछ । केही स्थानबाट सूर्यको ९० प्रतिशत वा त्यसभन्दा बढी भाग चन्द्रमाले ढाकेको देखिने नासाले जनाएको छ ।

अफ्रिका र मुख्यभूमि युरोपका केही क्षेत्रमा भने सूर्यास्तको समयमा ग्रहण देखिनेछ । तर, यो सूर्यग्रहण नेपालबाट भने देखिने छैन ।

खगोलीय नियमअनुसार चन्द्रमा पृथ्वी र सूर्यको बीचमा आएर सूर्यको प्रकाश पृथ्वीसम्म पुग्न अवरोध हुँदा सूर्यग्रहण लाग्छ । सूर्यग्रहणका लागि सूर्य, चन्द्रमा र पृथ्वी एकै सीधा रेखामा आउनुपर्छ ।

वैज्ञानिकहरूले सूर्यग्रहणलाई खाली आँखाले हेर्न नहुने चेतावनी दिएका छन् । साधारण सनग्लास प्रयोग गरेर पनि सूर्यग्रहण हेर्न सुरक्षित हुँदैन । यसबाट आँखाको रेटिनामा स्थायी क्षति पुग्न सक्ने भएकाले सूर्यग्रहण हेर्दा प्रमाणित विशेष सुरक्षात्मक चस्मा प्रयोग गर्नुपर्ने उनीहरूको सुझाव छ ।

नासालगायत विभिन्न खगोलीय संस्थाले भोलिको सूर्यग्रहणको प्रत्यक्ष प्रसारण गर्ने तयारी गरेका छन् ।

यसअघि २ असोज २०८२ मा पनि सूर्यग्रहण लागेको थियो । उक्त सूर्यग्रहण पनि नेपालबाट देखिएको थिएन । न्यूजिल्यान्ड, अस्ट्रेलिया, फिजी, टोङ्गा र अन्टार्कटिकालगायत क्षेत्रबाट त्यसबेला सूर्यग्रहण देखिएको थियो ।

सामान्यतया सूर्यग्रहण औँसीका दिन र चन्द्रग्रहण पूर्णिमाका दिन लाग्ने गर्छ।