मुग्लिन–नारायणगढ सडक तीन स्थानमा पहिरो, एकतर्फी मात्र सञ्चालन

चितवन । लगातारको वर्षापछि मुग्लिन–नारायणगढ सडकखण्डका तीन स्थानमा ढुंगा र लेदो खस्दा सडक एकतर्फी सञ्चालनमा आएको छ।

सडक डिभिजन कार्यालय भरतपुरका अनुसार तुइन खोला पुल, नाम्सी खोलाको नयाँ पुल र सिमलताल क्षेत्रमा पहिरोका कारण सवारी आवागमन प्रभावित भएको हो। तुइन खोला पुल र नाम्सी खोलाको नयाँ पुलमा माथिबाट ढुंगा खसेका छन् भने सिमलताल क्षेत्रमा लेदो सडकमा थुप्रिएपछि सडक एकतर्फी सञ्चालन गर्नुपरेको जनाएको छ।

पहिरो पन्छाउन सडक डिभिजनले डोजरसहित आवश्यक उपकरण परिचालन गरिसकेको छ। थप पहिरो नझरेको अवस्थामा करिब एक घण्टाभित्र सडकलाई दुवैतर्फी सञ्चालनमा ल्याउने तयारी भइरहेको कार्यालयले जनाएको छ।

लगातारको वर्षासँगै पहिरोको जोखिम अझै कायम रहेकाले यात्रा गर्नुअघि सडकको पछिल्लो अवस्था बुझेर मात्र सुरक्षित रूपमा यात्रा गर्न सडक डिभिजनले सवारी चालक तथा यात्रुलाई आग्रह गरेको छ।