राहदानी विभागका महानिर्देशक तीर्थराज अर्याल अख्तियारको नियन्त्रणमा

काठमाडौँ । अख्तियार दुरूपयोग अनुसन्धान आयोगले राहदानी विभागका महानिर्देशक तीर्थराज अर्याललाई नियन्त्रणमा लिएर अनुसन्धान सुरु गरेको छ। आयोगको टोलीले मंगलबार अर्याललाई नियन्त्रणमा लिएर पासपोर्ट आपूर्तिसम्बन्धी विषयमा बयान लिइरहेको स्रोतले जनाएको छ।

स्रोतका अनुसार पासपोर्ट खरिद तथा आपूर्तिसँग सम्बन्धित विषयमा आवश्यक सोधपुछका लागि अर्याललाई नियन्त्रणमा लिइएको हो। “हाल सोधपुछको प्रक्रिया जारी छ,” स्रोतले भन्यो, “अख्तियारको टोलीले सोमबार साँझ विभागबाट सम्बन्धित कागजातहरू समेत संकलन गरेको थियो।”

यसैबीच, महानिर्देशक अर्याल सोमबार प्रधानमन्त्री कार्यालय पुगेका थिए। प्रधानमन्त्रीसँग भेटघाट गर्ने उद्देश्यले उनी प्रधानमन्त्री कार्यालय गएको बताइएको छ। अख्तियारले घटनाबारे औपचारिक धारणा सार्वजनिक गरिसकेको छैन भने अनुसन्धान जारी रहेकाले थप विवरण आउन बाँकी रहेको जनाइएको छ।