काठमाडौं । गजल गीत ‘नजरका इशारा’ भिडियोसहित सार्वजनिक भएको छ ।

युट्युबमार्फत सार्वजनिक गरिएको गीतमा शब्द रचना किरण रिजाल रहेको छ भने स्वर कमल विष्ट र संगीत शशि विक्रम थापाको रहेको छ । गायक विष्ट ‘भ्वाइस अफ नेपाल’ सिजन २ का प्रतिस्पर्धी पनि रहनुभएको थियो ।

गीतमा युवायुवतीबीच अनायास उत्पन्न हुने प्रेम र त्यसले निम्त्याउने पीडालाई कलात्मक रूपमा प्रस्तुत गरिएको छ । भिडियोमा एक होटेलमा काम गर्ने युवकले त्यहीँ बस्न आएकी ग्राहकलाई मन पराउँछ, तर गलतफहमीकै कारण उनी मानसिक पीडामा फस्छन् । यो भावनात्मक कथा राज पौडेल र हेना नगरकोटीको प्रभावशाली अभिनयद्वारा जीवन्त भएको छ, जसको निर्देशन नारायण मगरले गर्नुभएको छ ।

सडक नाटकबाट अभिनय सुरु गरेका मोडल पौडेलले एक दशक भन्दा बढी समयदेखि टेलिभिजन विज्ञापन, म्युजिक भिडियो र वेब सिरिजहरूमा अभिनय गर्दै आउनुभएको छ भने नगरकोटीले विभिन्न वेब सिरिज, म्युजिक भिडियो र चलचित्रमा अभिनय गर्नुभएको छ । भिडियोका निर्देशक मगरले एक सयभन्दा बढी म्युजिक भिडियोहरूको निर्देशन र सम्पादन गर्नुभएको छ ।

यस भिडियोका सिनेमेटोग्राफर ज्ञानेन्द्र शर्मा हुमागाईँ हुनुहुनछ भने सम्पादक तथा रङ्ग संयोजक भीम विश्वकर्मा हुनुहुन्छ । भिडियो उत्पादन तथा वितरण रे अफ आर्ट्सले गरेको हो ।