पोखरा विमानस्थलमा सिधै ८ अर्ब भ्रष्टाचार भएको प्रेम आलेकाे दाबी

काठमाडौं। नेकपा (एकीकृत समाजवादी) पार्टीका सांसद प्रेम आलेले पोखरा अन्तर्राष्ट्रिय विमानस्थल निर्माणमा भएको भ्रष्टाचारबारेको अनुसन्धान प्रतिवेदनमा सार्वजनिक लेखा समितिले प्रश्न उठाएको भन्दै आपत्ति प्रकट गरेका छन् ।समाजवादीका नेतासमेत रहेका आलेले आफूहरुले ९ महिनासम्म मिहिनेत गरेर ल्याएको पोखरा विमानस्थल निर्माणबारेको प्रतिवेदनबारे केही नेताहरूले भ्रष्टाचारीको पक्षपोषण गर्नेगरी सञ्चारमाध्यममा बोलेकोसमेत बताए ।

राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनको संयोजकत्वमा गठित संसदीय उपसमितिले पोखरा अन्तर्राष्ट्रिय विमानस्थलमा १० अर्बभन्दा बढी भ्रष्टाचार भएको जिकिरसहित प्रतिवेदन बुझाएको थियो । उक्त प्रतिवेदनमाथि नेकपा एमालेका सांसद ऋषिकेश पोखरेल सभापति रहेको सार्वजनिक लेखा समितिले नै अविश्वास गरेको भन्दै आलेले आपत्ति जनाए । पूर्वपर्यटनमन्त्रीसमेत रहेका आलेले १४ अर्ब रुपैयाँको पोखरा विमानस्थल निर्माणको ठेक्का सार्वजनिक खरिद ऐनविपरीत २२ अर्बसम्म पुर्‍याएर भ्रष्टाचार गरिएको दाबी गरे ।

‘कतिपय सञ्चारमाध्यममा समितिकै साथीहरूले भ्रष्टाचारीको पक्षपोषण गरेका छन् । त्यो कुराको पनि विचार गर्नुपर्यो नि माननीय सभापतिज्यू । हामीले ९ महिनासम्म मिहिनेत गरेर प्रतवेदन बनाएका छौँ’, उनले भने, ‘धन्यवाद त कहाँ छ, कहाँ छ ? उल्टो शंका गर्ने ? म भन्न चाहन्छु–१४ अर्बको ठेक्कालाई सिधै २२ अर्ब पुयार्‍इएको छ । ८ अर्ब भ्रष्टाचार भयो कि भएन ? यो निर्णय सार्वजनिक खरिद ऐनविपरीत भयो कि भएन ?’