राष्ट्रिय सभामा गृहमन्त्री सुधन गुरुङको माफी : ‘मेरो भाषा अलि ठाडो भयो, क्षमाप्रार्थी छु’

काठमाडौं – गृहमन्त्री सुधन गुरुङले राष्ट्रिय सभा बैठकमा आफ्नो अभिव्यक्ति रुखो तथा ठाडो हुन पुगेको स्वीकार गर्दै सांसदहरूसँग माफी मागेका छन्।

राष्ट्रिय सभा बैठकमा विपद् व्यवस्थापनसम्बन्धी छलफलका क्रममा सांसदहरूले निर्मला पन्त हत्याकाण्डको विषय उठाएपछि गृहमन्त्री गुरुङले त्यस विषयमा प्रश्न नगर्न चेतावनीपूर्ण शैलीमा प्रतिक्रिया दिएका थिए। उक्त अभिव्यक्तिको चौतर्फी आलोचना भएपछि उनले सोही बैठकमा आफ्नो भनाइप्रति क्षमायाचना गरेका हुन्।

सांसदहरूलाई सम्बोधन गर्दै गृहमन्त्री गुरुङले भने, “हजुरहरूबाट हामीले धेरै सिक्न बाँकी छ। सिक्दै जानेछौं। मेरो तर्फबाट अलिकति ठाडो तरिकाबाट भयो जस्तो लाग्यो। त्यसका लागि म क्षमाप्रार्थी छु। हजुरहरूलाई माफी पनि माग्न चाहन्छु।”

उनले विपद् व्यवस्थापनसम्बन्धी छलफल चलिरहेका बेला विषयान्तर गर्दै निर्मला पन्त हत्याकाण्डको प्रसंग उठाइएको भन्दै त्यसप्रति असन्तुष्टि व्यक्त गरे।

“हामी विपद् व्यवस्थापनको विषयमा छलफल गर्दै थियौं। तर विषयकेन्द्रित नभई निर्मला पन्त हत्याकाण्ड जोडियो। मनसुनजन्य विपद् व्यवस्थापन र निर्मला पन्त हत्याकाण्डबीच के सम्बन्ध छ? छलफल विषयकेन्द्रित हुनुपर्छ,” गृहमन्त्री गुरुङले भने।

यसअघि उनको चेतावनीपूर्ण अभिव्यक्तिलाई लिएर संसदभित्र र बाहिर आलोचना भएपछि उनले आफ्नो भाषा र प्रस्तुतिप्रति खेद व्यक्त गर्दै औपचारिक रूपमा माफी मागेका हुन्।