काठमाडौंका होटल–रेस्टुरेन्टलाई धुम्रपानका लागि छुट्टै स्थान अनिवार्य बनाउन प्रशासनको निर्देशन

काठमाडौं । जिल्ला प्रशासन कार्यालय काठमाडौंले उपत्यकाभित्र सञ्चालित होटल तथा रेस्टुरेन्टलाई धुम्रपानसम्बन्धी कानुनी व्यवस्था कडाइका साथ पालना गर्न निर्देशन दिएको छ।

बुधबार सूचना जारी गर्दै प्रशासनले सूर्तिजन्य पदार्थ (नियन्त्रण तथा नियमन गर्ने) ऐन, २०६८ अनुसार धुम्रपान गर्न मिल्ने र नमिल्ने स्थान स्पष्ट रूपमा छुट्याउन सबै व्यवसायीलाई आग्रह गरेको हो।

प्रशासनका अनुसार धुम्रपानका लागि छुट्याइएको स्थान चारैतिरबाट बन्द हुने, त्यसको धुवाँ अन्य व्यक्तिमा नपुग्ने तथा सार्वजनिक स्वास्थ्यमा असर नपर्ने गरी व्यवस्थापन गर्नुपर्नेछ।

कार्यालयले सम्बन्धित निकायसँग समन्वय गरी होटल तथा रेस्टुरेन्टहरूको नियमित अनुगमन गरिने जनाएको छ। अनुगमनका क्रममा ऐनविपरीत धुम्रपानको व्यवस्था गरिएको वा कानुनी प्रावधानको पालना नगरेको पाइएमा सूर्तिजन्य पदार्थ (नियन्त्रण तथा नियमन गर्ने) ऐन, २०६८ को दफा १७ बमोजिम अधिकतम कानुनी कारबाही गरिने चेतावनी पनि प्रशासनले दिएको छ।