सम्पत्ति शुद्धीकरण मुद्दाः विष्णु पौडेललाई पाँचौँ पटक म्याद थप, थप तीन दिन हिरासतमा राख्न अनुमति

काठमाडौं । नेकपा एमालेका उपाध्यक्ष विष्णु पौडेललाई सम्पत्ति शुद्धीकरण (मनी लाउन्डरिङ) मुद्दामा अनुसन्धानका लागि विशेष अदालतले पाँचौँ पटक हिरासतमा राख्न अनुमति दिएको छ।

विशेष अदालतका न्यायाधीशद्वय नारायणप्रसाद पौडेल र उमेश कोइरालाको इजलासले सोमबार थप तीन दिन हिरासतमा राखेर अनुसन्धान गर्न म्याद दिएको हो।

सम्पत्ति शुद्धीकरण विभागले पौडेलमाथि सम्पत्ति शुद्धीकरणसम्बन्धी मुद्दामा अनुसन्धान गरिरहेको छ। विभागको पत्रका आधारमा उनलाई असार ८ गते सुर्खेतबाट पक्राउ गरिएको थियो।

पक्राउपछि विभागले विशेष अदालतबाट यसअघि चार पटक म्याद थप गरिसकेको थियो। सोमबारको आदेशसँगै अदालतले पाँचौँ पटक म्याद थप गर्दै अनुसन्धान जारी राख्न अनुमति दिएको हो।