चिलीको उत्तरी क्षेत्रमा ६.९ म्याग्निच्युडको शक्तिशाली भूकम्प

चिली। चिलीको राष्ट्रिय विपद् रोकथाम तथा प्रतिक्रिया सेवाले भूकम्प लगत्तै सूचना जारी गर्दै समुद्री तटीय क्षेत्रमा सुनामीको कुनै जोखिम नरहेको प्रष्ट पारेको छ। स्थानीय सञ्चारमाध्यमहरूका अनुसार भूकम्पको कडा धक्का अरिका, तारापाका, एन्टोफागास्टा र अटाकामा क्षेत्रहरूमा महसुस गरिएको थियो।

चिली विश्वकै सबैभन्दा बढी भूकम्पको जोखिममा रहेको देशहरूमध्ये एक हो। यहाँको जमिनमुनि नाज्का (Nazca), दक्षिण अमेरिकी र अन्टार्कटिक गरी तीन वटा टेक्टोनिक प्लेटहरू निरन्तर एकआपसमा जुध्ने प्रक्रिया चलिरहने भएकाले यहाँ बारम्बार भूकम्प गइरहन्छ। भौगोलिक संवेदनशीलताका कारण अभ्यस्त भइसकेका चिलीका नागरिकहरू सामान्यतया ७.० म्याग्निच्युडभन्दा कम शक्तिका भूकम्पलाई ठूलो चिन्ताको विषय मान्दैनन्।

यसअघि सन् १९६० मा चिलीको दक्षिणी सहर भाल्डिभिया ९.५ म्याग्निच्युडको शक्तिशाली भूकम्पबाट तहसनहस भएको थियो । यसलाई अहिलेसम्म रेकर्ड गरिएको विश्वकै सबैभन्दा शक्तिशाली भूकम्प मानिन्छ । जसका कारण ९ हजार ५०० जनाको मृत्यु भएको थियो । त्यस्तै, सन् २०१० मा मध्य चिलीको तटीय क्षेत्रमा ८.८ म्याग्निच्युडको भूकम्प गएको थियो । त्यसबाट आएको सुनामीका कारण ५२० भन्दा बढी मानिसको ज्यान गएको थियो ।