जाँचबुझ आयोगकै अध्यक्ष कार्कीमाथि छानबिन गर्न सिफारिस

काठमाडौं । राष्ट्रिय मानव अधिकार आयोगले भदौ २३ र २४ गते भएका घटनाबारे छानबिन गर्न सरकारले गठन गरेको न्यायिक छानबिन आयोगका अध्यक्ष गौरीबहादुर कार्कीमाथि समेत अनुसन्धान गर्न सिफारिस गरेको छ ।

आयोगले ती घटनामा भएको मानवीय तथा भौतिक क्षतिमा कार्कीको कुनै संलग्नता रहे–नरहेको र उनका सार्वजनिक अभिव्यक्तिबाट प्रदर्शनकारीहरू उत्तेजित वा आक्रोशित बने–नबनेको विषयमा छानबिन गर्नुपर्ने उल्लेख गरेको छ ।

सार्वजनिक शान्ति र सुव्यवस्थामा खलल पुग्ने गतिविधिमा उनीसहित अन्य व्यक्तिहरूको संलग्नता वा दुरुत्साहन रहेको भए त्यसबारे सूक्ष्म अनुसन्धान गरी दोषी देखिए कानुनी कारबाही गर्न आयोगले सिफारिस गरेको हो ।

जेनजी आन्दोलनका क्रममा कार्कीले सामाजिक सञ्जालमा दिएको अभिव्यक्तिलाई लिएर विवाद भएको थियो । त्यसकै बीच सरकारले उनलाई न्यायिक छानबिन आयोगको अध्यक्ष नियुक्त गरेपछि आलोचना समेत भएको थियो ।