सार्वजनिक यातायातको भाडा पुनः ५ प्रतिशत वृद्धि

काठमाडौं । सरकारले सार्वजनिक यातायातको भाडा पुनः वृद्धि गरेको छ। सार्वजनिक यात्रुवाहक सवारी, पहाडी क्षेत्रमा सञ्चालन हुने मालवाहक सवारी तथा तराई क्षेत्रमा सञ्चालन हुने मालवाहक सवारीको भाडा दरमा पाँच–पाँच प्रतिशतले वृद्धि गरिएको हो।

भौतिक पूर्वाधार तथा यातायात मन्त्रालयको वैशाख १२ गतेको निर्णयअनुसार बुधबारदेखि लागू हुने गरी दुई वा दुईभन्दा बढी प्रदेश जोड्ने राष्ट्रिय स्तरका रुटमा सञ्चालन हुने विद्युतीय सवारी बाहेकका सार्वजनिक यातायातमा नयाँ भाडादर लागू गरिएको मन्त्रालयले जनाएको छ।

यसअघि पनि सरकारले चैत २५ गते सार्वजनिक यातायातको भाडा वृद्धि गरेको थियो। लगातारको भाडा वृद्धिले सर्वसाधारण यात्रुमा थप आर्थिक भार परेको छ।