रुस–युक्रेन युद्धमा ४७ देशका नागरिक प्रयोग भइरहेको जेलेन्स्कीको आरोप, सूचीमा नेपाल र भारत पनि

न्युयोर्क,  युक्रेनी राष्ट्रपति भ्लोदिमिर जेलेन्स्कीले रुसले युक्रेनविरुद्धको युद्धमा नेपाल र भारतसहित ४७ देशका नागरिकलाई भर्ती गरेर प्रयोग गरिरहेको आरोप लगाएका छन्।

बुधबार संयुक्त राष्ट्रसंघको ८१औँ महासभालाई सम्बोधन गर्दै जेलेन्स्कीले रुसले विभिन्न देशका नागरिकलाई कथित रूपमा छल र प्रलोभनमार्फत आफ्नो देशमा पुर्‍याएर युद्धमा सहभागी गराइरहेको बताएका हुन्। उनका अनुसार तीमध्ये कतिपय विदेशी नागरिकले रणभूमिमा ज्यानसमेत गुमाइरहेका छन्।

जेलेन्स्कीले रुसले प्रयोग गरिरहेका नागरिकमा घाना, नेपाल, ताजिकिस्तान, भारत, यमन, केन्या, जिम्बाब्वे, क्युबा, बेलारुस, सुडान र दक्षिण अफ्रिका लगायतका देशका नागरिक रहेको उल्लेख गरे। उनले सम्बन्धित देशका सरकारलाई आफ्ना नागरिकलाई रुसी युद्धमा तानिनबाट रोक्न आग्रह गरेका छन्।

उनले रुसले आफ्ना नागरिकलाई युद्धमा पठाउन विभिन्न उपाय अपनाइरहेको दाबी गर्दै विदेशी नागरिकको ज्यान जाने क्रमसमेत देखिएको बताएका छन्। जेलेन्स्कीले रुसलाई युद्ध जारी राख्न सक्ने क्षमता कमजोर बनाउन अन्तर्राष्ट्रिय स्तरबाट थप दबाब आवश्यक रहेको बताएका छन्।

५१ भारतीयको मृत्यु भएको भारतको तथ्यांक

जेलेन्स्कीको दाबीबीच भारतले भने रुसी सेनामा रहेका आफ्ना नागरिकबारे यसअघि नै तथ्यांक सार्वजनिक गरिसकेको छ।

भारतका विदेश सचिव विक्रम मिस्रीले अगस्ट ३१ मा रुसी सशस्त्र बलमा २२७ जना भारतीय नागरिक भर्ती भएको जानकारी भारतसँग रहेको बताएका थिए। तीमध्ये १३९ जना सेवामुक्त भइसकेका र ५१ जनाको मृत्यु भएको उनले बताएका थिए। बाँकी भारतीय नागरिकको रिहाइ तथा स्वदेश फिर्ताका लागि भारतले रुसी पक्षसँग निरन्तर छलफल गरिरहेको जनाएको छ।

मिस्रीका अनुसार मस्कोस्थित भारतीय दूतावासले रुसी सेनामा रहेका भारतीय नागरिकको अवस्था तथा उनीहरूको रिहाइ र स्वदेश फिर्तासम्बन्धी विषयको नियमित अनुगमन गरिरहेको छ।

जेलेन्स्कीको पछिल्लो भनाइले रुस–युक्रेन युद्धमा विदेशी नागरिकको भर्ती र प्रयोगको विषयलाई फेरि अन्तर्राष्ट्रिय बहसमा ल्याएको छ। यद्यपि ४७ देशका नागरिकसम्बन्धी संख्या र भर्ती प्रक्रियाबारे जेलेन्स्कीले प्रस्तुत गरेको विवरणलाई उनको दाबीका रूपमा नै बुझ्नुपर्ने हुन्छ।