जर्मनीको सामना गर्दै कुरासाओ : विश्वकपको सबैभन्दा सानो राष्ट्रको ठूलो सपना

काठमाडौं ।  विश्वकप २०२६ अन्तर्गत आज हुने समूह ‘ई’ को खेलमा चार पटकको विश्व विजेता जर्मनी (Germany) र विश्वकपमा पहिलोपटक सहभागी भएको कुरासाओ(Curaçao) नेपाली समय अनुसार आज राति १०:४५ बजे आमनेसामने हुँदैछन्।
को हो कुरासाओ ?
क्यारिबियन सागरमा रहेको करिब १ लाख ६० हजार जनसंख्या भएको सानो टापु राष्ट्र कुरासाओ विश्वकप २०२६ मा छनोट हुने इतिहासकै सबैभन्दा सानो राष्ट्र बनेको छ। सन् २०१० मा नेदरल्यान्ड्स एन्टिलिस विघटन भएपछि यसले छुट्टै राष्ट्रिय टोलीको रूपमा अन्तर्राष्ट्रिय फुटबल खेल्न थालेको हो।
कुरासाओको फुटबल यात्रामा सन् २०१७ सबैभन्दा महत्वपूर्ण वर्ष बन्यो। उसले Caribbean Cup को उपाधि जित्दै पहिलो ठूलो अन्तर्राष्ट्रिय सफलता हासिल गरेको थियो। फाइनलमा जमैकालाई २–१ ले हराएर उपाधि उचालेको थियो।
त्यसपछि टोलीले लगातार प्रगति गर्दै CONCACAF Gold Cup मा क्वार्टरफाइनलसम्मको यात्रा तय गर्‍यो र अहिले विश्वकपसम्म आइपुगेको छ।
खेलका रोचक पक्ष
जर्मनी चार पटकको विश्व विजेता हो भने कुरासाओ विश्वकपमा पहिलो खेल खेल्दैछ।
जर्मनीको जनसंख्या करिब ८ करोड ४० लाख छ भने कुरासाओको मात्र करिब १ लाख ६० हजार।
कुरासाओका अधिकांश खेलाडी नेदरल्यान्ड्समा जन्मिएका वा त्यहाँको लिगमा खेलिरहेका छन्।
टोलीका प्रशिक्षक Dick Advocaat विश्वकप इतिहासकै सबैभन्दा पाका प्रशिक्षकमध्ये एक हुन्।
विश्वकपमा छनोट हुनुअघि धेरै फुटबल समर्थकले कुरासाओको नामसमेत सुनेका थिएनन्, तर अहिले उसले विश्व फुटबलको सबैभन्दा ठूलो मञ्चमा स्थान बनाएको छ।
किन विशेष छ यो खेल ?
जर्मनीका लागि यो सामान्य समूह चरणको खेल हुन सक्छ, तर कुरासाओका लागि यो इतिहास हो। विश्व फुटबलका महाशक्ति विरुद्ध विश्वकपको पहिलो खेल खेल्नु आफैंमा उसको फुटबल यात्राको सबैभन्दा ठूलो उपलब्धि मानिएको छ। प्रशिक्षक डिक एड्भोकाटले पनि टोलीसँग “गुमाउन केही छैन, जित्न धेरै छ” भन्ने मानसिकता रहेको बताएका छन्।
आजको खेलमा सबैको नजर जर्मनीको प्रदर्शनमा मात्र होइन, विश्वकपको नयाँ ‘सिन्ड्रेला टोली’ कुरासाओले कस्तो चुनौती दिन्छ भन्नेमा पनि रहनेछ।