विश्वकप लिग–२ मा नेपालको चुनौती आज नेदरल्याण्ड्सविरुद्ध, हारको शृंखला तोड्ने लक्ष्य

काठमाडौं । आईसीसी विश्वकप लिग–२ अन्तर्गत जारी सिरिजमा नेपालले आज नेदरल्याण्ड्ससँग प्रतिस्पर्धा गर्दैछ। नेपाली समयअनुसार खेल दिउँसो २:४५ बजे सुरु हुनेछ।

नेपाल यस सिरिजमा लगातार तीन खेलमा पराजित हुँदै दबाबमा रहेको छ। आजको खेलमा टोली हारको शृंखला अन्त्य गर्दै जितको लय समात्ने लक्ष्यसहित मैदानमा उत्रिनेछ। यता, नेदरल्याण्ड्सले भने सिरिजका आफ्ना दुवै खेल जित्दै उत्कृष्ट लय कायम राखेको छ।

नेपाल र नेदरल्याण्ड्सबीच हालसम्म ६ एकदिवसीय अन्तर्राष्ट्रिय (ओडीआई) खेल भएका छन्। तीमध्ये नेदरल्याण्ड्सले ४ खेल जितेको छ भने नेपालले २ खेल आफ्नो पक्षमा पारेको छ।

विश्वकप लिग–२ को अंकतालिकामा नेदरल्याण्ड्स ३० खेलबाट ३६ अंकसहित तेस्रो स्थानमा रहेको छ। नेपाल भने ३१ खेलबाट २४ अंक जोड्दै छैटौं स्थानमा रहेको छ। अंकतालिकामा आफ्नो स्थिति सुधार गर्न नेपालका लागि आजको खेल निकै महत्वपूर्ण मानिएको छ।