एनआइएमबि बैंकका सीइओ पाण्डेलाइ थुनाबाहिर राखेर अनुसन्धान गर्न माग

काठमाडौं । नेपाल इन्भेष्टमेन्ट मेगा बैंक लिमिटेड (एनआईएमबी) का प्रमुख कार्यकारी अधिकृत (सीईओ) ज्योति प्रकाश पाण्डेलाई प्रहरीले नियन्त्रणमा लिएको घटनाप्रति बैंकिङ क्षेत्रका चार प्रमुख छाता संगठनहरूले गम्भीर आपत्ति जनाएका छन् ।

नेपाल बैंकर्स संघ, डेभलपमेन्ट बैंकर्स एसोसिएसन नेपाल, नेपाल वित्तीय संस्था संघ तथा नेपाल लघुवित्त बैंकर्स संघले आइतबार संयुक्त प्रेस विज्ञप्ति जारी गर्दै पाण्डेको पक्राउप्रति ध्यानाकर्षण भएको बताएका हुन् । नेपाल प्रहरीको केन्द्रीय अनुसन्धान ब्यूरो (सीआईबी) ले उनलाई वैशाख ३० गते नियन्त्रणमा लिएको थियो ।

संगठनहरूले बैंक तथा वित्तीय संस्था प्रचलित कानुन र नेपाल राष्ट्र बैंकको निर्देशनअनुसार सञ्चालन हुने उल्लेख गर्दै बैंक तथा वित्तीय संस्था सम्बन्धी ऐन (बाफिया), २०७३ को दफा ५७ ले कर्जा असुलीका लागि बैंकलाई विशेष अधिकार दिएको बताएका छन् । उनीहरूका अनुसार कर्जा असुली सुनिश्चित गर्नु बैंकका प्रमुख कार्यकारी अधिकृतको महत्वपूर्ण जिम्मेवारी हो ।

विज्ञप्तिमा कर्जा असुलीकै विषयलाई लिएर सीईओ पक्राउ गरिनुले बैंकिङ क्षेत्रको साखमा नकारात्मक असर पर्न सक्ने र समग्र वित्तीय स्थायित्वमै चुनौती उत्पन्न हुन सक्ने उल्लेख गरिएको छ ।

संगठनहरूले अनुसन्धान प्रक्रियामा सहयोग गर्ने वातावरण बनाउन ‘पहिले सुन अनि थुन’ को सिद्धान्त अपनाउन आग्रह गर्दै पाण्डेलाई थुनामुक्त राखेर अनुसन्धान अगाडि बढाउन सम्बन्धित निकायसँग अपिल गरेका छन् । साथै, बैंकको गरिमा र उच्च पदस्थ कर्मचारीको मर्यादालाई ध्यानमा राख्दै अनुसन्धानका क्रममा अनावश्यक थुनामा नराख्नुपर्ने उनीहरूको माग छ ।