गुणस्तरीय शिक्षा र युवाको सक्रिय भूमिकामा सरकार प्रतिबद्ध : मन्त्री सस्मित पोखरेल

काठमाडौँ । शिक्षा तथा खेलकुदमन्त्री सस्मित पोखरेल ले सरकारले नेपालमै गुणस्तरीय शिक्षा उपलब्ध गराउने लक्ष्यका साथ काम गरिरहेको बताएका छन्।

काभ्रेपलाञ्चोकको धुलिखेलस्थित काठमाडौँ विश्वविद्यालय को ३१औँ दीक्षान्त समारोहलाई सम्बोधन गर्दै मन्त्री पोखरेलले समृद्ध र समुन्नत समाज निर्माणका लागि शिक्षित युवाको सक्रिय भूमिका अपरिहार्य रहेको उल्लेख गरे।

उनले सरकारले युवाले कल्पना गरेको समुन्नत समाज निर्माणका लागि निरन्तर प्रयास गरिरहेको भन्दै त्यस अभियानमा युवाको सक्रिय सहभागिता आवश्यक रहेको बताए। “सरकारले नेपालमै गुणस्तरीय शिक्षा उपलब्ध गराउने लक्ष्यका साथ काम गरिरहेको छ। यसका लागि शिक्षित युवाको सक्रिय भूमिका आवश्यक छ,” मन्त्री पोखरेलले भने।

मन्त्री पोखरेलले हालसम्म काठमाडौँ विश्वविद्यालयबाट ५१ हजारभन्दा बढी जनशक्ति उत्पादन भइसकेको उल्लेख गर्दै ती जनशक्तिले राष्ट्र निर्माण र समुन्नत समाज निर्माणमा महत्वपूर्ण योगदान दिनुपर्ने अपेक्षा व्यक्त गरे। उनले विश्वविद्यालयबाट प्राप्त ज्ञान, सीप र अनुभव नेपालमै सदुपयोग गर्दै देश विकासमा लाग्न दीक्षित विद्यार्थीलाई आग्रहसमेत गरे।

“नेपालमै अवसर पाइन्छ, सरकारले थप अवसर सिर्जना गर्नेछ,” भन्दै उनले विद्यार्थीलाई आत्मविश्वासका साथ देशमै भविष्य निर्माण गर्न प्रेरित गरे। समारोहमा उनले विभिन्न विधामा उपाधि प्राप्त विद्यार्थीलाई शैक्षिक प्रमाणपत्र प्रदान गरेका थिए।

कार्यक्रममा विश्वविद्यालयका उपकुलपति प्रा. डा. ऋषिकेश वाग्लेले कृत्रिम बुद्धिमत्ता र अटोमेशनको तीव्र विकाससँगै प्राविधिक दक्षतासँगै नैतिकता, विवेक, सांस्कृतिक चेतना र राष्ट्रप्रतिको जिम्मेवारीलाई पनि समान रूपमा अघि बढाउनुपर्नेमा जोड दिए।

समारोहका विशेष अतिथि तथा भारतस्थित डेक्कन कलेज पोस्ट–ग्राजुएट एण्ड रिसर्च इन्स्टिच्युट का कुलपति प्रा. डा. भूपेन्द्र पाटद्र्धनले नेपाल–भारतबीच शिक्षा, अनुसन्धान तथा परम्परागत ज्ञानको आदानप्रदानलाई थप सुदृढ बनाउनुपर्ने आवश्यकता औँल्याए। उनले शिक्षालाई आत्मविश्वास, नैतिकता र जिम्मेवारीसहित समाजको हितमा प्रयोग गर्न विद्यार्थीलाई आग्रह गरे।