“समावेशी प्रतिनिधित्व मेरो लागि पार्टी विजयभन्दा महत्वपूर्ण” : प्रचण्ड

काठमाडौं । नेपाली कम्युनिष्ट पार्टीका संयोजक तथा पूर्वप्रधानमन्त्री पुष्पकमल दाहाल प्रचण्डले संघीय संसदमा सुनिश्चित भएको समावेशी तथा समानुपातिक प्रतिनिधित्वलाई आफ्नो पार्टीको निर्वाचन परिणामभन्दा पनि ठूलो उपलब्धिका रूपमा व्याख्या गरेका छन् ।

मंगलबार प्रतिनिधिसभा बैठकलाई सम्बोधन गर्दै उनले महिला, दलित, आदिवासी जनजाति, मधेसी, मुस्लिम, थारु तथा उत्पीडित समुदायको संसदमा भएको उपस्थितिलाई लामो संघर्ष, बलिदान र क्रान्तिको उपलब्धि भएको बताए ।उनले संघीय लोकतान्त्रिक गणतन्त्रअन्तर्गतको संसदलाई “इन्द्रधनुषी प्रतिनिधित्व” भएको संस्था भन्दै यस्तो प्रतिनिधित्व आफ्नो लागि पार्टीको विजयभन्दा बढी महत्वपूर्ण रहेको उल्लेख गरे ।

प्रचण्डले विगतको संसद र वर्तमान प्रतिनिधिसभाको तुलना गर्दै आदिवासी जनजाति, मधेसी, मुस्लिम, थारु र पछाडि पारिएका समुदायको सहभागितामा उल्लेखनीय वृद्धि भएको दाबी गरे ।
समावेशी प्रतिनिधित्व सहज रूपमा प्राप्त नभएको उल्लेख गर्दै यसका पछाडि ठूलो संघर्ष र बलिदान जोडिएको बताए ।

उनले भने, “यो प्रतिनिधित्वको कथा रगत र क्रान्तिले लेखिएको हो । महिलाहरूले पिठ्यूँमा दुधे बालक र काँधमा बन्दूक बोकेर गरेको संघर्षको योगदान यसमा जोडिएको छ ।”साथै, उनले सामन्तवादविरुद्धको आन्दोलनले उत्पीडित समुदायका नागरिकलाई राज्यको नेतृत्व तहसम्म पुग्ने बाटो खोलेको दाबी गरे ।

पार्टी फरक भए पनि समावेशी प्रतिनिधित्वप्रति सबैले गर्व गर्नुपर्ने उल्लेख गर्दै उनले परिवर्तनका लागि भएको संघर्षलाई ऐतिहासिक उपलब्धिको रूपमा स्मरण गरे ।