अब नयाँ समझदारी आवश्यक छ : लिङ्देन

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले मुलुक अत्यन्तै विषम परिस्थितिमा रहेको बताएका छन् । नेकपा एमालेको ११औँ महाधिवेशनलाई सम्बोधन गर्दै अध्यक्ष लिङ्देनले अहिले नेपालको निर्णायकत्व संकटमा परेको र देश गम्भीर रूपमा भू–राजनीतिक चक्रव्यूहमा फसेको उल्लेख गरे ।

‘संविधान त मरिसकेको छ। त्यसकारणले त्यो संविधानलाई जबरजस्ती ब्यूँताएर देशलाई थप दुर्घटनामा लैजानेभन्दा पनि अब देशमा एउटा नयाँ समझदारी कायम गर्नुपर्छ,’ उनले भने।

उनले भदौ २३ र २४ गतेको जेन–जी विद्रोह वर्षौँदेखिको निषेधको राजनीतिको परिणाम भएको बताए।

उनले भने, ‘गत भदौ २३, २४ गतेको जेनजी आन्दोलनमा देशले अपूर्ण क्षति व्यहोर्यो । हामीले देशलाई केन्द्रमा राखेर देशले जित्ने एउटा निर्णय गर्नुपर्छ । त्यस्तो निर्णय गर्दा तीनवटा कुराहरुलाई आधार मान्नुपर्छ । नेपालको ठूलाठूला राजनीतिक परिवर्तनहरु ०७ सालको प्रजातन्त्र, २०४६ सालको बहुदलीय व्यवस्था, ०६२,६३ को समावेशी र समानुपातिक प्रणालीलाई जोगाएर अब देशमा नयाँ समझदारी कायम गर्नुपर्छ ।’