सगरमाथाको शिखरमा फहराइएको संघीय संसद्को झण्डा सभामुख र अध्यक्षलाई हस्तान्तरण

काठमाडौँ । सङ्घीय संसद्को झन्डासहित सर्वोच्च शिखर सगरमाथाको सफलतापूर्वक आरोहण गरेका प्रतिनिधिसभा सदस्य मिङमा ग्याबु शेर्पा सम्मानित भएका छन् ।

सभामुख डोलप्रसाद (डीपी) अर्याल, राष्ट्रियसभाका अध्यक्ष नारायणप्रसाद दाहाल, उपसभामुख रुबी ठाकुर र राष्ट्रियसभाका उपाध्यक्ष लीलाकुमारी भण्डारीले उहाँलाई संयुक्त रूपमा सम्मानपत्रद्वारा सम्मान गरेका हुन् ।

सङ्घीय संसद् सचिवालयमा आयोजित विशेष समारोहमा विश्वकीर्तिमानधारी आरोही शेर्पालाई राष्ट्रिय स्वतन्त्र पार्टी (रास्वपा) का प्रमुख सचेतक कवीन्द्र बुर्लाकोटी, सचेतक प्रकाशचन्द्र परियार तथा विभिन्न संसदीय समितिका सभापतिहरूले बधाई ज्ञापन गरेका थिए ।

त्यस अवसरमा आरोही सांसद शेर्पाले सगरमाथाको शिखरमा फहराएकाे सङ्घीय संसद्को झन्डा सभामुख अर्याल र राष्ट्रियसभाका अध्यक्ष दाहाललाई हस्तान्तरण गरेका थिए ।