मिटरब्याज समस्या झन् जटिल बन्दै, अदालतअगाडि पीडितको आत्मदाह प्रयास

   जनकपुरधाम । मिटरब्याजसम्बन्धी विवाद समाधानका लागि लामो समयदेखि आन्दोलन गर्दै आएका पीडितहरूको असन्तुष्टि झन् उग्र बन्दै गएको छ । धनुषा जिल्ला अदालतमा मिटरब्याजसम्बन्धी मुद्दामा थुनछेक बहस चलिरहेका बेला अदालतबाहिर एक पीडित महिलाले आत्मदाहको प्रयास गरेपछि समस्या समाधान हुन नसक्दा पीडितहरू चरम निराशामा पुगेको देखिएको छ ।

बुधबार दिउँसो अदालतअगाडि मिटरब्याज पीडितहरूले नाराबाजीसहित विरोध प्रदर्शन गरिरहेका बेला जनकपुरधाम–४ की फुल कुमारी रजकले आफ्नै शरीरमा पेट्रोल छर्किएर आत्मदाहको प्रयास गरेकी हुन् । प्रहरीले तत्काल उनलाई नियन्त्रणमा लिएपछि सम्भावित ठूलो दुर्घटना हुनबाट जोगिएको छ ।

अदालतभित्र मिटरब्याजसम्बन्धी आरोपमा पक्राउ परेका गोपाल साह, रेखा साह र हरेराम साहविरुद्ध थुनछेक बहस भइरहेको छ । मुद्दामा अदालतको प्रक्रिया अघि बढिरहँदा बाहिर भने पीडितहरूले विरोध प्रदर्शन गर्दै आफ्ना माग सम्बोधन गर्न दबाब दिइरहेका छन् ।

मिटरब्याजका कारण आफूहरू आर्थिक तथा सामाजिक रूपमा संकटमा परेको भन्दै पीडितहरूले लामो समयदेखि आन्दोलन गर्दै आएका छन् । साहुबाट लिएको ऋणको अस्वाभाविक ब्याज, कागजातमा गरिएको चलखेल, जग्गा तथा सम्पत्ति गुम्ने अवस्था र कानुनी प्रक्रियामा न्याय पाउन कठिन भएको गुनासो पीडितहरूले गर्दै आएका छन् ।

धनुषा अदालतअगाडि भएको आत्मदाह प्रयासले मिटरब्याज समस्या केवल आर्थिक लेनदेनको विवादमा सीमित नरहेको र यसले पीडितहरूमा गहिरो मानसिक तथा सामाजिक दबाबसमेत सिर्जना गरिरहेको संकेत गरेको छ । न्यायिक प्रक्रिया अघि बढे पनि पीडितहरूले तत्काल न्यायको अनुभूति गर्न नसकेको अवस्था आन्दोलनका क्रममा देखिएको हो ।

पीडित पक्षले आफूहरूका समस्या दीर्घकालीन रूपमा समाधान हुने गरी प्रभावकारी कानुनी कार्यान्वयन, दोषीमाथि कारबाही र आफूले गुमाएका सम्पत्ति तथा अधिकार फिर्ताको सुनिश्चितता माग गर्दै आएको छ ।

धनुषा अदालतअगाडिको घटनाले मिटरब्याजविरुद्धको आन्दोलनलाई थप संवेदनशील बनाएको छ । पीडितको आत्मदाह प्रयासले समस्या समाधानका लागि केवल मुद्दा र अदालती प्रक्रियाले मात्र पर्याप्त नहुने तथा पीडितको गुनासो सम्बोधन गर्न राज्यका सम्बन्धित निकायबीच थप प्रभावकारी समन्वय आवश्यक रहेको देखाएको छ ।