बलिउडका वरिष्ठ अभिनेता नाना पाटेकरको ७५ वर्षको उमेरमा निधन

काठमाडौं । बलिउडका वरिष्ठ तथा प्रभावशाली अभिनेता नाना पाटेकरको ७५ वर्षको उमेरमा निधन भएको छ। भारतीय सञ्चारमाध्यमका अनुसार उनको बिहीबार बिहान गोवास्थित आफ्नै निवासमा निधन भएको हो।
नाना पाटेकरलाई गोवाको डोना पाउलास्थित निवासमा अचेत अवस्थामा भेटिएपछि तत्काल मणिपाल अस्पताल लगिएको थियो। चिकित्सकको टोलीले करिब ४५ मिनेटसम्म सीपीआर दिएर बचाउने प्रयास गरे पनि उनलाई बचाउन नसकिएको र बिहान करिब ५ः२० बजे मृत घोषणा गरिएको समाचारमा जनाइएको छ। प्रारम्भिक विवरणअनुसार उनको मृत्यु कार्डियक अरेस्टका कारण भएको हो।
पाटेकरको निधनको खबरले भारतीय चलचित्र क्षेत्रसँगै उनका लाखौँ प्रशंसकलाई स्तब्ध बनाएको छ। करिब पाँच दशक लामो अभिनय यात्रामा उनले आफ्नो विशिष्ट आवाज, संवाद प्रस्तुत गर्ने शैली र सजीव अभिनयमार्फत हिन्दी तथा मराठी सिनेमामा छुट्टै पहिचान बनाएका थिए।
सन् १९७८ मा प्रदर्शनमा आएको ‘गमन’ बाट उनले चलचित्र क्षेत्रमा प्रवेश गरेका थिए। त्यसअघि उनी रंगमञ्चमा सक्रिय थिए। त्यसपछि उनले गम्भीर, सामाजिक तथा चरित्रप्रधान भूमिकादेखि हास्यप्रधान भूमिकासम्म विभिन्न प्रकारका चरित्रलाई जीवन्त बनाउँदै दर्शकमाझ प्रभाव छाडे।
उनका चर्चित चलचित्रमा ‘परिन्दा’, ‘प्रहार : द फाइनल अट्याक’, ‘क्रान्तिवीर’, ‘अग्निसाक्षी’, ‘खामोशी : द म्युजिकल’, ‘अब तक छप्पन’, ‘वेलकम’, ‘राजनीति’, ‘शक्ति : द पावर’, ‘अपहरण’ र ‘ट्याक्सी नम्बर ९२११’ लगायत छन्। मराठी चलचित्र र रंगमञ्चमा पनि उनको महत्वपूर्ण योगदान थियो।
‘परिन्दा’ र ‘क्रान्तिवीर’ लगायतका चलचित्रमा गरेको अभिनयका लागि उनले राष्ट्रिय चलचित्र पुरस्कारसहित विभिन्न प्रतिष्ठित सम्मान प्राप्त गरेका थिए। सन् २०१३ मा भारत सरकारले उनलाई पद्मश्री सम्मान प्रदान गरेको थियो। उनी अभिनेता मात्र नभई निर्देशक तथा रंगकर्मीका रूपमा पनि सक्रिय थिए।
निधन हुनुभन्दा चार दिनअघि मात्रै उनी गोवामा आयोजित एक कार्यक्रममा सहभागी भएका थिए। उक्त कार्यक्रममा उनी स्थानीय कलाकारसँग नाच्दै र परम्परागत वाद्ययन्त्र बजाउँदै गरेको दृश्य सार्वजनिक भएको थियो।
नाना पाटेकरको निधनसँगै भारतीय चलचित्रले आफ्नो विशिष्ट शैली र सशक्त अभिनयका लागि परिचित एक प्रभावशाली कलाकार गुमाएको छ। उनको अभिनय यात्रा र पर्दामा प्रस्तुत गरेका चरित्रहरू भने दर्शकको स्मृतिमा लामो समयसम्म जीवित रहनेछन्।