वेस्ट बैंकमा १ हजार २३४ नयाँ बस्तीका घर निर्माणको तयारी, पश्चिमा देशद्वारा विरोध

काठमाडौँ ।  इजरायलले कब्जामा रहेको वेस्ट बैंकको रणनीतिक रूपमा महत्वपूर्ण ‘ई–१’ क्षेत्रमा नयाँ बस्ती विस्तारका लागि १ हजार २३४ घर निर्माणको बोलपत्र आह्वान गरेपछि प्रमुख पश्चिमा देशहरूले विरोध जनाएका छन्।

बेलायत, फ्रान्स, जर्मनी, इटाली र क्यानडाले संयुक्त वक्तव्य जारी गर्दै इजरायलको निर्णयलाई ‘अस्वीकार्य’ भन्दै योजना तत्काल फिर्ता लिन आग्रह गरेका छन्। उनीहरूले यस्तो कदमले मध्यपूर्वको शान्ति प्रक्रियामा थप क्षति पुर्‍याउनुका साथै इजरायलको अन्तर्राष्ट्रिय प्रतिष्ठामा समेत असर पार्ने बताएका छन्।

संयुक्त राष्ट्रसंघका महासचिवले पूर्वी जेरुसेलम नजिकको ‘ई–१’ क्षेत्रमा बस्ती विस्तार गर्ने योजनाले निरन्तर र एकीकृत प्यालेस्टिनी राज्य निर्माणको सम्भावनामा गम्भीर खतरा उत्पन्न गर्ने बताएका छन्।

इजरायलको आवास मन्त्रालयले बुधबार ३ हजार ४०१ घर निर्माणका लागि स्वीकृत योजनामध्ये १ हजार २३४ घरका लागि बोलपत्र आह्वान गरेको हो। उक्त क्षेत्र पूर्वी जेरुसेलम र माले अदुमिम बस्तीबीच करिब १२ वर्ग किलोमिटरमा फैलिएको छ।

प्यालेस्टिनी तथा इजरायली शान्ति समर्थक समूहहरूले उक्त योजनाविरुद्ध अदालतमा चुनौती दिएका छन्। उनीहरूका अनुसार सो क्षेत्रमा बस्ती निर्माण भए वेस्ट बैंकको उत्तर र दक्षिण भाग एकअर्काबाट छुट्टिने तथा पूर्वी जेरुसेलम पनि अलग पारिनेछ। यसले दुई राज्यको समाधानको सम्भावना थप कमजोर बनाउने उनीहरूको दाबी छ।

सन् १९६७ को युद्धपछि इजरायलले वेस्ट बैंक र पूर्वी जेरुसेलममा करिब १६० बस्ती निर्माण गरिसकेको छ, जहाँ करिब ७ लाख इजरायली बसोबास गर्दै आएका छन्। अन्तर्राष्ट्रिय समुदायले इजरायली बस्तीलाई अन्तर्राष्ट्रिय कानुनविपरीत मान्दै आएको छ।