विशेष महाधिवेशनमा सभापति पनि आउनुपर्छ: भण्डारी

काठमाडौं। नेपाली कांग्रेसका नेता चन्द्र भण्डारीले पुस २७ गते आइतबार सुरू हुने दोस्रो विशेष महाधिवेशनमा पार्टी सभापति शेरबहादुर देउवा पनि सहभागी हुन आउनुपर्ने बताएका छन्।

उनले शुक्रबार पत्रकारहरूसँग कुरा गर्दै पार्टीलाई मिलाएर लैजान सभापति पनि महाधिवेशनमा सहभागी हुनुपर्ने बताएका हुन्।दोस्रो विशेष महाधिवेशन पक्षधरले विशेष महाधिवेशनमा भाग लिन पार्टी सभापति शेरबहादुर देउवालाई निम्तो गर्ने तयारी गरिरहेको छ। विशेष महाधिवेशन व्यवस्थापन समितिका संयोजक मनोजमणि आचार्यका अनुसार पार्टी सभापति देउवा र कार्यवाहक सभापति पूर्णबहादुर खड्कालाई प्रमुख अतिथिका रूपमा निमन्त्रणा गरिनेछ।

यसका लागि शनिबारसम्म चिठी पठाउने तयारी भइरहेको आचार्यले बताए।यो विशेष महाधिवेशनका लागि हस्ताक्षर गर्ने २४८८ जना महाधिवेशन प्रतिनिधि आयोजकका रूपमा रहने छन्। कांग्रेसका कुल महाधिवेशन प्रतिनिधिमध्ये यो ५४ प्रतिशतभन्दा बढी हो।