रास्वपाको समानुपातिक सूचीप्रति तोसिमाले जनाइन् आपत्ति

काठमाडौं । राष्ट्रिय स्वतन्त्र पार्टी (रास्वपा) की नेतृ तोसिमा कार्कीले पार्टीले निर्वाचन आयोगमा बुझाएको समानुपातिक उम्मेदवारको बन्दसूचीप्रति कडा आपत्ति जनाएकी छन्। समानुपातिक प्रणालीको मूल मर्मविपरीत सूची तयार गरिएको भन्दै उनले पार्टीभित्र देखिएको आफन्तवाद र नातावादको अन्त्य हुनुपर्ने माग गरेकी छन्।

सामाजिक सञ्जाल फेसबुकमार्फत प्रतिक्रिया दिँदै कार्कीले समानुपातिक प्रणालीको उद्देश्य भौगोलिक रूपमा पछाडि परेका, पहुँच र शक्ति नपुगेका तर सक्षम व्यक्तिलाई प्रतिनिधित्व गराउने रहेको उल्लेख गरेकी छन्। उनले कर्णाली, सुदूरपश्चिम, गाउँ र विपन्न समुदायको आवाज समानुपातिक सूचीमा प्रतिबिम्बित हुनुपर्नेमा जोड दिँदै पार्टी नेतृत्वका आफन्त र प्रभावशाली व्यक्तिहरू नै सूचीमा प्राथमिकतामा पर्नुले प्रणालीकै औचित्यमाथि प्रश्न उठेको बताएकी छन्।

उनले समानुपातिक प्रणालीले समावेशीकरण गर्नुपर्ने हो, निषेध गर्न होइन भन्ने स्पष्ट गर्दै पार्टीले पेश गरेको सूचीले समावेशीताको भावना कमजोर बनाएको आरोप लगाएकी छन्। साथै, पार्टी पदाधिकारीहरूलाई समानुपातिक सूचीमा राखिएकोप्रति असन्तुष्टि जनाउँदै उनले प्राइमरी भोटिङको मर्ममाथि धक्का पुगेको टिप्पणी गरेकी छन्।

कार्कीले पार्टीको महत्त्वपूर्ण जिम्मेवारीमा रहेका नेताहरूले समानुपातिकको साटो प्रत्यक्ष निर्वाचन लड्ने साहस देखाउनुपर्ने धारणा राखेकी छन्। पार्टी ठूलो भइसकेको अवस्थामा पनि नेतृत्व तहका नेताहरू प्रत्यक्ष चुनाव लड्न हिच्किचाएको भन्दै उनले प्रश्न उठाएकी छन्।

उल्लेखनीय छ, रास्वपाले समानुपातिक बन्दसूचीका लागि प्राइमरी भोटिङ गरे पनि अग्रपंक्तिमा रहेका केही व्यक्तिहरू सूचीमा नपरेको र केही सेलिब्रेटी, पार्टी पदाधिकारी तथा सचिवालय सदस्यहरू समेटिएको विषयले पार्टीभित्र असन्तोष बढाएको देखिन्छ।