विराटनगर । नेपाली कांग्रेसभित्र नेतृत्व र वैधानिकताको विवाद चर्किरहेका बेला केन्द्रीय सदस्य डा. रणबहादुर रावलले गगन थापा र विश्वप्रकाश शर्मा नेतृत्वको गतिविधिमाथि कडा प्रश्न उठाएका छन्। सुदूरपश्चिमका नेता रावलले पूर्वको कोशी प्रदेश राजधानी विराटनगरमा आयोजित नेपाली कांग्रेस देउवा पक्षीय मोरङ जिल्ला अधिवेशनलाई सम्बोधन गर्दै केही व्यक्तिले चटक देखाएर पार्टी कब्जा गर्न खोजेको आरोप लगाएका हुन्।
‘नेपाली कांग्रेस जादुगर र चटकेले चलाउन सक्दैनन्,’ भन्ने कडा अभिव्यक्ति दिँदै उनले पार्टी कुनै व्यक्तिको लोकप्रियता, प्रभाव वा प्रदर्शनका आधारमा नभई विधि, विधान, मूल्य, मान्यता र कार्यकर्ताको योगदानका आधारमा सञ्चालन हुनुपर्ने बताए।
रावलले आफ्नै समूहका नेताहरूलाई समेत खबरदारी गर्दै पार्टीमा सबै नेता तथा कार्यकर्ताको योग्यता, क्षमता, अनुभव र योगदानका आधारमा भूमिका तथा जिम्मेवारी निर्धारण हुनुपर्नेमा जोड दिए। विगतमा नेतृत्वले कार्यकर्ताको योगदान र उचित जिम्मेवारीका विषयमा ध्यान नदिँदा असन्तुष्टि बढेको र त्यही असन्तुष्टिमा खेल्दै गगन थापा समूहले पार्टीभित्र आफ्नो प्रभाव विस्तार गरेको उनको आरोप थियो।
उनले गगन थापा र विश्वप्रकाश शर्माले पार्टीको विधि, विधान र स्थापित मूल्य मान्यतालाई बेवास्ता गर्दै पार्टी कब्जा गरेको आरोपसमेत लगाए। थापा समूहका गतिविधिलाई कांग्रेसको आन्तरिक विवादका रूपमा मात्र बुझ्न नहुने उल्लेख गर्दै उनले यसले पार्टीलाई मात्र नभई मुलुकको लोकतान्त्रिक व्यवस्था र राजनीतिक संस्कृतिलाई समेत कमजोर बनाउन सक्ने धारणा राखे।
कांग्रेसभित्रको विवाद विशेष महाधिवेशनबाट गगन थापा सभापतिमा निर्वाचित भएपछि थप चर्किएको हो। शेरबहादुर देउवा पक्षले विशेष महाधिवेशनको प्रक्रिया विधानसम्मत नभएको दाबी गर्दै आएको छ भने थापा पक्षले बहुमत महाधिवेशन प्रतिनिधिको मागअनुसार विधानले दिएको अधिकार प्रयोग गरेर महाधिवेशन आयोजना गरिएको बताउँदै आएको छ।
यसैबीच पार्टीको आधिकारिकता, नेतृत्व चयनको प्रक्रिया र विशेष महाधिवेशनको वैधानिकतालाई लिएर दुवै पक्षबीच कानुनी तथा राजनीतिक संघर्ष जारी छ। निर्वाचन आयोगले थापा नेतृत्वको कार्यसमितिलाई आधिकारिकता दिएपछि देउवा पक्ष अदालत पुगेको थियो। आर्थिक लेनदेन भएको भन्ने आरोपसहित सार्वजनिक भएको अडियोले पनि विवादलाई थप चर्चामा ल्याएको छ। तर उक्त आर्थिक लेनदेनसम्बन्धी आरोप स्वतन्त्र रूपमा प्रमाणित भएको छैन र थापा पक्षले त्यसलाई अस्वीकार गर्दै आएको छ।
पार्टीभित्र पुस्तान्तरण र नेतृत्व परिवर्तनको बहस चलिरहेका बेला रावलको अभिव्यक्तिले देउवा पक्षभित्रको असन्तुष्टिलाई सार्वजनिक रूपमा थप उजागर गरेको छ। उनले पार्टीमा परिवर्तनको नाममा विधि र विधानलाई कमजोर बनाउन नहुने सन्देश दिँदै नेतृत्वलाई कार्यकर्ताको योगदान र क्षमताको उचित मूल्यांकन गर्नसमेत आग्रह गरेका छन्।
विराटनगरबाट रावलले दिएको अभिव्यक्तिले कांग्रेसभित्रको शक्ति संघर्षलाई फेरि चर्चामा ल्याएको छ। पार्टीको नेतृत्व कसले गर्ने भन्ने विवादसँगै कांग्रेसमा विधि, विधान, संगठनात्मक अनुशासन र लोकतान्त्रिक अभ्यासको विषय पनि बहसको केन्द्रमा पुगेको छ।
© 2026: Fast news मा सर्वाधिक सुरक्षित छ । बिज्ञापन | सम्पर्क | हाम्रो बारेमा
Developed by: Webbank nepal Pvt.Ltd
प्रतिक्रिया