प्रतिनिधिसभा बैठकमा विपक्षी दलहरूको अवरोध

काठमाडौँ । प्रतिनिधि सभाको मंगलबारको बैठकमा विपक्षी दलहरूले अवरोध गरेका छन् । शून्य समय र विशेष समय सकिएपछि विपक्षी सांसदहरूले प्रधानमन्त्री संसदमा उपस्थित भएर सांसदहरूको प्रश्नको जवाफ दिनुपर्ने माग गर्दै बैठक अवरुद्ध गरेका हुन् ।

विपक्षी दलहरूले प्रधानमन्त्री संसदप्रति जवाफदेही हुनुपर्ने भन्दै तत्काल बैठकमा उपस्थित गराउन सभामुखसँग माग गरेका थिए । उनीहरूले सभामुखबाट स्पष्ट रुलिङसहित प्रधानमन्त्री आउने समय तोक्न पनि आग्रह गरेका छन् ।

अवरोधका क्रममा सभामुख डिपी अर्यालले सरकार र सत्ता पक्षसँग छलफल भइरहेको तथा प्रधानमन्त्री सांसदका प्रश्नको जवाफ दिन तयार रहेको जानकारी गराएका थिए ।

तर विपक्षी दलहरूले प्रधानमन्त्रीको निश्चित उपस्थितिको समय सार्वजनिक गर्नुपर्ने अडान राख्दै नाराबाजी जारी राखेका थिए । विपक्षीको विरोधकै बीच सभामुख अर्यालले बैठकको कार्यसूची अघि बढाएका छन् ।