पश्चिमी न्यूनचापीय प्रणालीको प्रभावः देशभर बदली र वर्षाको सम्भावना

काठमाडौँ । जल तथा मौसम विज्ञान विभागले हाल नेपालमा पश्चिमी न्यूनचापीय प्रणाली, स्थानीय वायु तथा पूर्वी भू-भाग नजिक रहेको न्यूनचापीय क्षेत्रको प्रभाव सक्रिय रहेको जनाएको छ ।

विभागका अनुसार अहिले बागमती, गण्डकी, लुम्बिनी, कर्णाली र सुदूरपश्चिम प्रदेशसहित कोशी प्रदेशको हिमाली क्षेत्रमा सामान्यदेखि पूर्ण बदली रहेको छ भने अन्य भू-भागमा आंशिक बदली देखिएको छ । गण्डकी र लुम्बिनीका केही स्थानमा तथा बागमती, कर्णाली र कोशी प्रदेशका थोरै स्थानमा मेघगर्जन तथा चट्याङसहित हल्कादेखि मध्यम वर्षा भइरहेको छ ।

आज दिउँसो देशका पहाडी तथा हिमाली क्षेत्रमा सामान्य बदली रहने र तराई क्षेत्रमा आंशिक बदली रहने पूर्वानुमान गरिएको छ । लुम्बिनी, कर्णाली र सुदूरपश्चिम प्रदेशसहित अन्य पहाडी तथा हिमाली भू-भागका केही स्थानमा मेघगर्जन/चट्याङसहित मध्यम वर्षा तथा उच्च हिमाली क्षेत्रमा हिमपातको सम्भावना रहेको विभागले जनाएको छ । तराईका केही स्थानमा हल्का वर्षा हुन सक्ने अनुमान गरिएको छ ।

त्यस्तै, आज राति कोशी प्रदेशसहित हिमाली क्षेत्रमा सामान्य बदली कायम रहनेछ भने अन्य भू-भागमा आंशिक बदली रहनेछ । कोशी प्रदेशका केही स्थानमा मेघगर्जनसहित मध्यम वर्षा हुने तथा मधेशसहित अन्य पहाडी र हिमाली क्षेत्रका एक–दुई स्थानमा हल्का वर्षा तथा हिमपातको सम्भावना रहेको विभागले जनाएको छ ।