कांग्रेस एकता जोगाउन गगनलाई पूर्णबहादुरको आग्रह : ‘महाधिवेशन सारेर देउवासहित अग्रजसँग संवाद थाल्नुस्’

काठमाडौं,  नेपाली कांग्रेसका निवर्तमान कार्यवाहक सभापति पूर्णबहादुर खड्काले पार्टी सभापति गगन थापालाई १५औँ महाधिवेशनको कार्यतालिका केही समय स्थगित गरेर पार्टीभित्रको एकता कायम गर्न तत्काल संवाद थाल्न आग्रह गरेका छन्।

खड्काले बिहीबार सामाजिक सञ्जाल फेसबुकमार्फत थापालाई सम्बोधन गर्दै आफू र थापाबीच वैशाख २१ गते भएको संवादपछि नै थापाले अहिले गरेको निर्णय त्यही महिनामा लिएको भए जेठको पहिलो साताभित्र कांग्रेस एकताबद्ध भएर सानेपास्थित केन्द्रीय कार्यालयमा उभिन सक्ने अवस्था बन्ने दाबी गरेका छन्।

‘तपाईं आज जुन निर्णयमा पुग्नुभयो, त्यो निर्णय वैशाख २१ को हामीबीच भएको संवादपछि त्यही महिनामा निर्णय गर्नुभएको भए, जेठको पहिलो साताभित्र सिंगो कांग्रेस तपाईंको नेतृत्वमा सानेपा पार्टी केन्द्रीय कार्यालयमा सम्पूर्ण रूपमा एकताबद्ध भएर जुरुक्क उभिन्थ्यो,’ खड्काले लेखेका छन्।

उनले त्यसो हुन सके देशभर मात्र नभई संसारभर रहेका कांग्रेसका नेता, सदस्य तथा शुभेच्छुकमा उत्साह, हौसला र पार्टी निर्माणका लागि ठूलो ऊर्जा सिर्जना हुने धारणा राखेका छन्।

खड्काले थापालाई आफ्नो पछिल्लो निर्णयबारे गम्भीर आत्मसमीक्षा गर्न आग्रह गर्दै ‘समय बलवान हुन्छ, पुनः कठोर संकल्प गर्नुस्’ भनेका छन्।

उनले थापासमक्ष मुख्यतः दुईवटा सुझाव अघि सारेका छन्। पहिलो, असोज ३ गतेदेखि प्रारम्भ गर्ने घोषणा गरिएको १५औँ अधिवेशनको कार्यतालिका स्थगित गरी केही समयका लागि सार्नुपर्ने र दोस्रो, १४औँ महाधिवेशनबाट निर्वाचित सभापति शेरबहादुर देउवा तथा अन्य अग्रज नेताहरूसँग थापाकै अग्रसरतामा तत्काल वार्ता–संवाद सुरु गर्नुपर्ने।

खड्काले कांग्रेसको सम्पूर्ण एकता अझै सम्भव रहेको आफूलाई विश्वास रहेको बताएका छन्।

तर, दुईवटा अलग–अलग अधिवेशनको प्रक्रिया रोक्न नसकिए कांग्रेस विभाजन रोक्न कसैले नसक्ने दाबीसमेत उनले गरेका छन्।

त्यसपछि खड्काले कांग्रेस विभाजनको केही महिनाभित्रै नेकपा एमाले, नेपाली कम्युनिस्ट पार्टीलगायत संविधान निर्माणमा महत्वपूर्ण भूमिका खेलेका अन्य दलमा समेत विभाजन हुन सक्ने आफ्नो आशंका व्यक्त गरेका छन्। यो उनको राजनीतिक विश्लेषण तथा आशंकाका रूपमा प्रस्तुत गरिएको हो।

उनले पछिल्ला घटनाक्रम, विभिन्न गतिविधि र राजनीतिक चलखेलले देशमा जातीय, क्षेत्रीय तथा धार्मिक द्वन्द्वको जोखिम बढाउन सक्ने भन्दै त्यसबाट राष्ट्रियता, भौगोलिक अखण्डता, सार्वभौमसत्ता र स्वाभिमानमा पर्न सक्ने प्रभावप्रति चिन्ता व्यक्त गरेका छन्।

खड्काले थापालाई आफूले विगतमा पाएका सल्लाह–सुझाव र भएका घटनाक्रमलाई गहिरो शिक्षाका रूपमा लिएर निर्मम आत्मसमीक्षा गर्न पनि आग्रह गरेका छन्।

उनले पार्टी एकताका लागि आफू कुनै महत्वाकांक्षाबाट मुक्त भएर जस्तोसुकै त्याग गर्न र इमानदारीपूर्वक सहयोग गर्न तयार रहेको बताएका छन्।

आफ्नो विश्लेषण र ‘अन्तरात्माको आवाज’बाट व्यक्त धारणा गलत साबित हुँदा आफू नै सबैभन्दा खुसी हुने पनि खड्काले आफ्नो फेसबुक सन्देशको अन्त्यमा उल्लेख गरेका छन्।

पृष्ठभूमिमा, कांग्रेसभित्र १५औँ महाधिवेशनको प्रक्रियालाई लिएर फरक–फरक धारणा देखिँदै आएको छ। पछिल्लो समय सभापति थापाले पार्टीभित्रका असन्तुष्ट पक्षसँग संवाद अघि बढाइरहेका समाचार आएका छन्। खड्का पक्ष र अन्य समूहसँग सहमतिको प्रयास भइरहे पनि महाधिवेशनको नेतृत्व र कार्यतालिकालाई लिएर मतभेद कायम रहेको विवरण सार्वजनिक भएका छन्।