आज गणेशमानसिंहको जन्मजयन्ती मनाइँदै

काठमाडौं। आज नेपाली राजनीतिमा त्याग र साहसको उदाहरणका रूपमा रहेका वि.सं.२०४६ सालका आन्दोलनका कमाण्डर गणेशमान सिंहको १११ औं जन्मजयन्ती मनाइँदैछ । गणेशमान सिंह विसं २०४६ को जनआन्दोलन सफल भएपछि तत्कालीन राजा वीरेन्द्रले प्रधानमन्त्री बन्न गर्नुभएको प्रस्तावमा उनले आफ्ना समकक्षी नेता कृष्णप्रसाद भट्टराईलाई अघि सार्दै नेपाली राजनीतिमा त्यागको उच्च नमूना प्रस्तुत गरेका थिए।

१९७२ कात्तिक २४ गते काठमाडौंको क्षेत्रपाटीमा जन्मिएका नेता सिंहको विसं २०५४ असोज २ गते निधन भएको हो। काठमाडौंको खानदानी परिवारमा जन्मिएका सिंहले विसं १९९७ मा स्थापना भएको नेपालको पहिलो राजनीतिक दल प्रजा परिषद्को सदस्य भई राणा शासन हटाउने अभियानमा आफूलाई सक्रिय बनाएका थिए।