अत्याधिक मतका साथ ब्राइस ओलिगुइ एनगुएमा बने गाबोनको राष्ट्रपति

काठमाडौं ।अफ्रिकी देश गाबोनका सैनिक जनरल ब्राइस ओलिगुइ एनगुएमा भएको राष्ट्रपति निर्वाचनमा ९० प्रतिशतभन्दा बढी मत हासिल गरी विजय हासिल गरेका छन् ।
शनिबार भएको निर्वाचनमा उनले विजय हासिल गरेका हुन् ।

जनरल ब्राइस ओलिगुइ एनगुएमाले सन् २०२३मा ‘कु’मार्फत झन्डै ६० वर्ष लामो राष्ट्रपति अली बोंगोको पारिवारिक शासनकालको अन्त्य गर्दै नेतृत्व हत्याएका थिए ।

राष्ट्रपति अली बोंगोको शासनकाल समाप्त भएको लगभग दुई वर्षपछि जनरल एनगुएमाले शासन सत्तामा अझ बलियो पकड बनाएको बीबीसीले जनाएको छ ।

५० वर्षीय ओलिगुइ एनगुएमाले बोंगो शासनकालका पूर्वप्रधानमन्त्री एलेन क्लाउड बिली–बाइन्जे सहित सात अन्य उम्मेदवारहरूलाई पराजित गरे ।

एनगुएमालाई गम्भीर राजनीतिक चुनौती दिन सक्ने विपक्षी दलका केही प्रमुख नेताहरूलाई निर्वाचनबाट बाहिर राखिएको थियो ।