संयुक्त हिन्दू मोर्चाका थप ६ मागमा गृहमन्त्री गुरुङ सकारात्मक, कार्यान्वयनका लागि पहल गर्ने प्रतिबद्धता

जनकपुर । संयुक्त हिन्दू मोर्चा र गृहमन्त्री सुदन गुरुङबीच आइतबार पुनः वार्ता भएको छ। जनकपुरधामस्थित यात्री निवास होटलमा भएको छलफलमा मोर्चाले शनिबार बुझाएको १३ बुँदे मागपत्रमा संशोधन गर्दै थप ६ वटा माग समावेश गरेको हो।

वार्ताका क्रममा गृहमन्त्री गुरुङले थप गरिएका मागहरूप्रति सकारात्मक धारणा व्यक्त गर्दै काठमाडौं फर्किएपछि ती मागहरूको कार्यान्वयनका लागि आवश्यक पहल गर्न आफूले कुनै कसर बाँकी नराख्ने प्रतिबद्धता जनाएका छन्।

यसअघि शनिबार दुई चरणमा भएको छलफलमा संयुक्त हिन्दू मोर्चाले गृहमन्त्रीलाई १३ बुँदे मागपत्र बुझाएको थियो। तर केही माग स्पष्ट नभएको तथा थप विषय समेट्नुपर्ने भन्दै हिन्दूवादी युवाहरूले असन्तुष्टि जनाएका थिए।

सोही मागलाई स्पष्ट पार्ने र नयाँ विषय समावेश गर्ने उद्देश्यले गृहमन्त्री गुरुङले आइतबार बिहान पुनः वार्ताका लागि आह्वान गरेका थिए। वार्तापछि संशोधित मागपत्रमा थप ६ बुँदा समावेश गरिएको जनाइएको छ।