राष्ट्रिय सभा सांसद बलदेव बोहराको निधन

काठमाडौं । राष्ट्रिय सभा सदस्य बलदेव बोहराको निधन भएको छ ।उनको आज दिउँसो निधन भएको पारिवारिक स्रोतले जनाएको छ । बोहरा कम्मरको अपरेशन गरेर उपचाररत थिए ।

उनी कञ्चनपुर काँग्रेसका संस्थापक नेता हुन् र संविधान सभा सदस्य हुँदै संसद् निर्माणमा समेत भूमिका निभाएका थिए । उनी २०५८ सालमा तत्कालीन प्रधानमन्त्री शेर बहादुर देउवाको राजनीतिक सल्लाहकार पनि बनेका थिए ।

विसं २००८ साल जेठ ६ गते जन्मिनुभएका बोहराले विसं २०२२ सालमा अखिल भारतीय नेपाली विद्यार्थी संघको सदस्यता लिएर आफ्नो राजनीतिक यात्रा सुरु गर्नुभएको थियो। उहाँ भिमदत्त पन्त र नेपाली कांग्रेसका संस्थापक नेता बीपी कोइरालाबाट प्रेरित हुनुहुन्थ्यो।

राजनीतिक गतिविधिका क्रममा बोहराले पाँच वर्ष जेल जीवन बिताउनुभएको थियो। उहाँ कञ्चनपुर नेपाली कांग्रेसका संस्थापक नेतामध्ये एकका रूपमा परिचित हुनुहुन्छ।