logo

२०८३ मंसिर ४ बिहीबार

logo
  • २०८३ मंसिर ४ बिहीबार
  • कर प्रशासनलाई प्रविधिमैत्री र पारदर्शी बनाउने अर्थमन्त्री वाग्लेको प्रतिबद्धता

    850Shares
    कर प्रशासनलाई प्रविधिमैत्री र पारदर्शी बनाउने अर्थमन्त्री वाग्लेको प्रतिबद्धता

    काठमाडौं । अर्थमन्त्री स्वर्णिम वाग्लेले कर प्रशासनलाई प्रविधिमैत्री, सरल, सहज र पारदर्शी बनाउने प्रतिबद्धता व्यक्त गरेका छन् ।

    राष्ट्रिय कर दिवसको अवसरमा मंगलबार आयोजित कार्यक्रममा बोल्दै उनले कर प्रशासनको डिजिटल रूपान्तरण, कर अनुपालना अभिवृद्धि तथा कर विवाद समाधानलाई सरकारले प्राथमिकतामा राखेको बताए ।

    उनले कर प्रशासनको डिजिटल रूपान्तरण र स्वचालनलाई समग्र सुशासनको महत्त्वपूर्ण आधारका रूपमा अघि बढाइने उल्लेख गरे ।

    अर्थमन्त्री वाग्लेले आन्तरिक राजस्व विभागको एकीकृत कर प्रणालीलाई सरल, सुरक्षित, व्यवसायमैत्री र करदातामैत्री बनाउन आवश्यक प्राविधिक सुधार गरिने बताए । कारोबार, लेखापालन, प्रतिवेदन तयारी, आय विवरण पेस तथा कर दाखिलासम्मका प्रक्रियालाई प्रविधिमार्फत सहज र स्वचालित बनाइने उनको भनाइ थियो ।

    त्यस्तै, लामो समयदेखि कर तथा विवरण दाखिला नगरेका र न्यायिक तथा अर्धन्यायिक निकायमा कर विवादमा रहेका करदातालाई सरकारले उपलब्ध गराएको छुट तथा सहुलियतको उपयोग गर्न उनले आग्रह गरे ।

    आर्थिक ऐनमार्फत ल्याइएका कर छुट तथा सहुलियतका योजनाबारे पर्याप्त प्रचारप्रसार हुन नसकेको भन्दै उनले ती सुविधाबारे करदातालाई जानकारी गराउन आन्तरिक राजस्व विभागलाई निर्देशनसमेत दिए ।

    वाग्लेले करदाताका लागि सरकारले ऐतिहासिक राहतका कार्यक्रम ल्याएको उल्लेख गर्दै शुल्क, दस्तुर, थप दस्तुर तथा जरिवानाका कारण समस्यामा परेका करदातालाई पुसभित्रै उपलब्ध सुविधाको लाभ लिन आग्रह गरे ।

    कर विवाद समाधानमार्फत सरकारले ठूलो राहत प्रदान गरेको उनको भनाइ थियो । उनले कर विवाद समाधानका क्रममा खर्बौँ रुपैयाँ बराबरको दायित्व व्यवस्थापन गरिएको उल्लेख गर्दै करका दर तथा जरिवानासम्बन्धी छुटका योजनालाई महत्त्वपूर्ण सुधारका रूपमा व्याख्या गरे ।

    यस्ता सुविधा पटक–पटक उपलब्ध नहुने भन्दै उनले लामो समयदेखि कर विवादमा अल्झिएका करदातालाई अहिलेको अवसर सदुपयोग गरी कर प्रणालीमा पुनः जोडिन आग्रह गरे ।

    करदातालाई राहत दिने निर्णय सरकारको सुशासनप्रतिको प्रतिबद्धताकै कारण सम्भव भएको उनले बताए । सुशासनप्रति प्रतिबद्ध र इमानदार सरकारबाट मात्रै यस्ता उदार राहतका कार्यक्रम ल्याउन सम्भव हुने उनको भनाइ थियो ।

    यसैगरी, अर्थमन्त्री वाग्लेले कर न्याय, संस्थागत सुशासन र नागरिक सहभागितालाई कर प्रणाली सुधारका महत्त्वपूर्ण पक्षका रूपमा प्रस्तुत गर्दै कर प्रशासनलाई थप प्रभावकारी र उत्तरदायी बनाउनुपर्नेमा जोड दिए ।



    फास्ट न्युज    
  • २०८३ मंसिर २, मंगलवार
  • प्रतिक्रिया

    सम्बन्धित समाचार
    ताजा अपडेट