झापाको कचनकबलमा विद्यालय बस दुर्घटना: १३ विद्यार्थी घाइते, चालक फरार

काठमाडौं ।  झापाको कचनकबल गाउँपालिका–३ मा विद्यार्थी बोकेको बस दुर्घटना हुँदा १३ जना विद्यार्थी घाइते भएका छन्।

विद्यापानी माध्यमिक विद्यालयको प्र१–०१–००१ ख ४४८२ नम्बरको बस दुर्गाभिट्टाबाट आमबारीतर्फ जाँदै गर्दा भित्री सडक खण्डमा मोटरसाइकलसँग ठोक्किँदा अनियन्त्रित भई पल्टिएको हो। जिल्ला प्रहरी कार्यालयका सूचना अधिकारी खगेन्द्रबहादुर खड्काका अनुसार प्र१–०१–०१३ प ३४८२ नम्बरको मोटरसाइकललाई ठक्कर दिएपछि बस दुर्घटनामा परेको हो।

बसमा सवार १८ जनामध्ये १३ जना विद्यार्थी घाइते भएका छन्। घाइतेमध्ये ११ जनालाई उपचारका लागि बिर्तामोडस्थित मनमोहन सामुदायिक अस्पतालमा भर्ना गरिएको छ।

दुर्घटनामा मोटरसाइकल चालक कचनकबल–३ का ५२ वर्षीय ओमप्रसाद तिम्सिनाको मुख, टाउको र खुट्टामा चोट लागेको छ। दुर्घटनापछि बस चालक फरार रहेको प्रहरीले जनाएको छ।