भारतको बिहार विधानसभा चुनावको मत गणना जारी

काठमाडौं। भारतको बिहार विधानसभा चुनावको मतगणना जारी छ। नोभेम्बर ६ र ११ मा भएको निर्वाचनको मत गणना आज बिहान ८ बजेदेखि सुरू भएकाे भारतको निर्वाचन आयोगले जनाएको छ।

बिहार विधानसभा चुनावमा २४३ सिटको नतिजा आज घोषणा हुन लागेको छ । मुख्य प्रतिस्पर्धा एनडीए र विपक्षीको महागठबन्धनबीच छ । यसैबीच, जनसुराजले पनि बलियो उपस्थितिको दाबी गरिरहेका छन्। बहुमत हासिल गर्न कुनै पनि दल वा गठबन्धनले १२२ सिट हासिल गर्नुपर्छ।

एनडीए र महागठबन्धन दुवैले जितको दाबी गरेका छन्। दुवै दलले रेकर्ड मतदाता मतदानमा पनि फरक मत राखेका छन्। एनडीएले यसलाई सुशासनको समर्थनमा जनादेश भनेको छ भने विपक्षीले यसलाई जनताको परिवर्तनको चाहनाको संकेतको रूपमा हेरिरहेको छ।

जनताले राज्यको सबैभन्दा लामो समयसम्म मुख्यमन्त्री रहेका नीतीश कुमारलाई दोस्रो मौका दिनेछन् वा परिवर्तनको बाटो रोज्नेछन् भन्ने विषय केही समय पछि थाहा पाइने छ ।