बालेनसँग सम्बन्ध बिग्रिएको छैन, ‘एक्लो’ स्टाटसमा राजनीतिक अर्थ नखोजौँ : रवि

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीका सांसदहरूको अभिव्यक्तिका कारण कहिलेकाहीँ विवाद उत्पन्न भए पनि त्यसलाई सम्हाल्दै पार्टी अघि बढ्ने बताएका छन् ।

रास्वपाको संसदीय दलको बैठकपछि सञ्चारकर्मीसँग कुरा गर्दै लामिछानेले बुधबार भएको छलफललाई संसदीय दलको औपचारिक बैठक नभई संसदमा पार्टीको प्रस्तुति र समसामयिक विषयमा गरिएको आन्तरिक छलफल भएको बताए ।

उनले ठूलो राजनीतिक दलमा धेरै सांसद भएकाले कहिलेकाहीँ कुनै सांसदको अभिव्यक्ति विवादमा पर्न सक्ने भन्दै त्यसलाई पार्टीले सम्हालेर अघि बढ्ने बताए ।

‘राजनीतिक दलभित्र धेरै सांसद भएको ठूलो राजनीतिक दलमा कहिलेकाहीँ कसैको कुरा बोल्दा चिप्लिन सक्ला । धेरै छौँ, धेरैले धेरै कुरा गर्दा एक–दुई जना साथीहरूको बोलाइ कहिलेकाहीँ विवादमा पर्छ । त्यसलाई सम्हालेर हामी अगाडि बढिहाल्छौँ,’ उनले भने ।

लामिछानेका अनुसार संसदमा रास्वपाका सांसदहरूको प्रस्तुति कस्तो भइरहेको छ भन्ने विषयमा पार्टीभित्र समीक्षा गरिएको थियो । संसदमा उठाइने विषय र त्यसको प्रस्तुतीकरणबारे आम नागरिकस्तरबाट समेत प्रश्न उठिरहेकाले आन्तरिक समीक्षा आवश्यक भएको उनको भनाइ थियो ।

यस्तै, सरकार, मन्त्रालय तथा मन्त्रीहरूका विषयमा पार्टीभित्र कुनै असन्तुष्टि वा प्रश्न छन् कि छैनन् भन्नेबारे पनि छलफल गरिएको उनले बताए ।

‘संसदको मर्यादा कायम गर्ने जिम्मेवारी हाम्रो रहन्छ । संसदमा मर्यादित ढंगले प्रस्तुत हुने र उठ्ने विषयवस्तु आम नागरिकको जीवनसँग जोडिएका हुनेलगायत सबै विषयमा एकैपटक छलफल गरेर बेटर अन्डरस्ट्यान्डिङका साथ अगाडि बढ्ने भन्ने विषयमा छलफल गर्‍यौँ,’ लामिछानेले भने ।

यसैबीच, लामिछानेले प्रधानमन्त्री बालेन शाहसँग आफ्नो सम्बन्ध बिग्रिएको भन्ने चर्चाको खण्डन गरेका छन् । प्रधानमन्त्री शाहले सामाजिक सञ्जालमा ‘एक्लै लडिरहेको’ आशयको स्टाटस लेखेको विषयमा पत्रकारले प्रश्न गरेपछि लामिछानेले त्यसलाई प्रधानमन्त्रीको ‘कवि भावना’का रूपमा टिप्पणी गरे ।

‘दुई जनाबीच झगडा पर्‍यो भनेर लेख्नुहुन्छ, हामीलाई रमाइलो लाग्छ । तपाईंहरूको समाचारले हामीलाई अझ नजिक ल्याइरहेको छ । त्यसैले समाचार लेख्न नरोक्नुहोला,’ उनले भने ।

प्रधानमन्त्री शाह कवि र कलाकारसमेत भएकाले उनका हरेक शब्दको राजनीतिक अर्थ खोज्न आवश्यक नरहेको लामिछानेले बताए । ‘यहाँ पार्टी सिंगै उभिएको छ, कहाँ एक्लो हुनुहुन्छ ?’ उनले प्रश्न गरे ।