मतदाता नामावली अद्यावधिक गर्न निर्वाचन आयोगको आग्रह

काठमाडौं । निर्वाचन आयोगले मतदाता नामावलीमा रहेका विवरण अद्यावधिक तथा त्रुटि सच्याउन सम्बन्धित मतदातालाई अनुरोध गरेको छ ।

आयोगका सहसचिव एवं प्रवक्ता नारायणप्रसाद भट्टराईका अनुसार मतदाता नामावलीलाई शुद्ध, अद्यावधिक, विश्वसनीय र वस्तुगत बनाउन आयोगले नियमित रूपमा नामावली अद्यावधिक गर्दै आएको छ । सोहीअनुसार मौजुदा मतदाता नामावली अद्यावधिक गर्ने प्रयोजनका लागि आगामी असोज १ गते आयोगको वेबसाइटमा मतदाता नामावली प्रकाशन गरिनेछ ।

प्रकाशित नामावलीमा आफ्नो नाम, थर, उमेर, ठेगाना लगायतका विवरणमा त्रुटि भएमा सच्याउन आयोगले आग्रह गरेको छ । त्यस्तै, कसैले झुट्टा विवरण पेस गरी मतदाता नामावलीमा नाम समावेश गरेको जानकारी भएमा त्यसबारे समेत सच्याउन सकिने आयोगले जनाएको छ ।

कुनै मतदाताको नाम एकभन्दा बढी स्थानमा समावेश भएको भए एक स्थानमा मात्र कायम गर्न तथा बसाइँसराइ वा विवाहका कारण स्थायी ठेगाना परिवर्तन भएको भए सोहीअनुसार विवरण अद्यावधिक गर्न आयोगले अनुरोध गरेको छ ।

मतदाता नामावलीमा रहेका विवरण यथार्थ र अद्यावधिक बनाउन सम्बन्धित मतदाताको समेत महत्वपूर्ण भूमिका रहने आयोगले जनाएको छ ।