रवि लामिछाने: खोला किनार व्यवस्थापनको अस्थायी कठिनाइले दीर्घकालीन समाधान दिने विश्वास

काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले खोला किनारमा बसोबास गर्ने नागरिकको व्यवस्थापन प्रक्रियामा केही असहजता भए पनि त्यसको दीर्घकालीन परिणाम सकारात्मक हुने विश्वास व्यक्त गरेका छन्।

शुक्रबार पार्टीका सांसदहरूसँगको बैठकपछि सञ्चारकर्मीसँग प्रतिक्रिया दिँदै उनले विगतमा खोला आसपासका बासिन्दालाई सुरक्षित स्थानमा स्थानान्तरण गर्ने वा वैकल्पिक जग्गा उपलब्ध गराउने विषयमा विभिन्न मोडलमार्फत प्रयास भए पनि ती प्रभावकारी हुन नसकेको बताए।

उनका अनुसार खोला किनारका बासिन्दाको व्यवस्थापनको आवश्यकता सबै राजनीतिक दलले महसुस गरेका थिए र यस विषयमा कसैले पनि असहमति जनाएको थिएन। तर विगतमा अपनाइएका उपायहरूले अपेक्षित परिणाम दिन नसकेपछि हाल नयाँ प्रक्रिया अघि बढाइएको उनले बताए।

लामिछानेले नयाँ प्रक्रियाका कारण नागरिकले केही समय कठिनाइ भोग्नुपरेको स्वीकार गर्दै अन्ततः त्यसले सकारात्मक प्रतिफल दिने विश्वास व्यक्त गरे। उनले लामो समयदेखि रहँदै आएको समस्याको समाधानका लागि अहिलेको अस्थायी असहजता भविष्यमा उपलब्ध हुने सुविधासँग तुलना गर्दा कम महसुस हुने बताए।

यसैबीच, संविधान संशोधनबारे बोल्दै लामिछानेले प्रदेश संरचनालाई थप प्रभावकारी बनाउने विषयमा खुला बहस आवश्यक रहेको धारणा राखे। उनले प्रदेश संरचनालाई बोझिलो बनाउनेभन्दा पनि थप प्रभावकारी र व्यवहारिक बनाउनेतर्फ ध्यान दिनुपर्ने बताए।

उनका अनुसार संविधान संशोधनको बहसमा प्रदेश संरचना पनि महत्वपूर्ण विषय भएकाले यसमा सर्वदलीय सहमतिका आधारमा छलफल हुन आवश्यक छ।