पूर्वउपराष्ट्रपति पुनविरुद्ध सुन तस्करी प्रकरणमा अनुसन्धान अघि बढाइयो

काठमाडौं । पूर्वउपराष्ट्रपति एवम् माओवादी केन्द्रका उपाध्यक्ष नन्दबहादुर पुन (पासाङ) र उनका छोराहरूविरुद्ध प्रहरीले अनुसन्धान तीब्र पारेको छ । विद्युतीय चुरोट (भेप) मा सुन लुकाएर तस्करी प्रकरणमा अनुसन्धान अघि बढाएको हो ।

यसै सन्दर्भमा, माओवादी केन्द्रका उपाध्यक्ष र पूर्वसभामुख कृष्णबहादुर महरालाई आइतबार प्रहरीले पक्राउ गरेको छ। उनीमाथि चिनियाँ संगठित गिरोहसँग मिलेर सुन तस्करी गरेको आरोप लगाइएको छ र हाल उनीमाथि अनुसन्धान प्रक्रिया चलिरहेको छ। रोल्पाका राङ्सी निवासी नन्दबहादुर पुन पनि यस प्रकरणमा मुछिएका छन्। नेपाल प्रहरीका एक उच्च अधिकारीका अनुसार, सुन तस्करीको जाँचमा पुनको नाम पनि आएको हो।

दुई वर्षअघि, पुनका जेठा छोरा जितेन्द्रले हुम्लाबासीको कागजातको दुरुपयोग गर्दै सीमा पार गर्ने परिचयपत्र गृह मन्त्रालयबाट बनाएका थिए। त्यसपछि, हुम्ला र चीनको सीमावर्ती क्षेत्र ताक्लाकोट पुगेका उनीहरूले चिनियाँ टोलीसँग चार किलो सुन बुझेको समाचार बाहिर आएको थियो। यो प्रकरण त्यसपछि सार्वजनिक भएको हो, जब उनीहरूले भुक्तानीको ब्याज र रकम चिनियाँ पक्षलाई नदिएको थियो।